നയൻതാരയുടെ 'കൊളമാവ് കോകില'യിലെ ആദ്യ ഗാനം എത്തി

ഡോറ, അറാം, വേലൈക്കാരൻ എന്നീ സൂപ്പർഹിറ്റ് ചിത്രങ്ങൾക്കുശേഷം നയൻതാര കേന്ദ്രകഥാപാത്രമാകുന്ന 'കൊളമാവ് കോകില' (കൊകോ)യിലെ ആദ്യ ഗാനം പുറത്തു വിട്ടു. കല്യാണ വയസ് എന്നു തുടങ്ങുന്ന ഗാനമാണ് ഇപ്പോൾ പുറത്ത് വിട്ടിരിക്കുന്നത്. അനിരുദ്ധ് രവിചന്ദറിന്‍റേതാണ് സംഗീതം. യോഗി ബാബുവുമായുള്ള രംഗങ്ങളാണ് ഗാനത്തിൽ ഉൾപ്പെടുത്തിയിരിക്കുന്നത്. നായികയുടെ പിന്നാലെ പ്രണയം പറഞ്ഞ് യോഗി ബാബുവിന്‍റെ കഥാപാത്രം ചുറ്റുന്നതായുള്ള രംഗങ്ങൾ അതീവ രസകരമായാണ് ചിത്രീകരിച്ചിരിക്കുന്നത്.

നായികാ പ്രാധാന്യമുള്ള ചിത്രത്തിൽ സംഗീത സംവിധായകനായ അനിരുദ്ധ് രവിചന്ദ്രനാണ് നയന്‍സിന്‍റെ നായകന്‍. ലോഡി സൂപ്പര്‍ സ്റ്റാറിന്‍റെ നായികാ പ്രാധാന്യമുള്ള പുതിയ ചിത്രത്തിൽ പത്തുമിനിറ്റ് മാത്രമാണ് അനിരുദ്ധിന്‍റെ കഥാപാത്രത്തിനുള്ളത്. നയന്‍താരയുടെ ഭര്‍ത്താവായാണ് അനിരുദ്ധ് എത്തുക. ഉറ്റസുഹൃത്തായ നെല്‍സണിന്‍റെ നിര്‍ബന്ധത്തെ തുടര്‍ന്നാണ് ചിത്രത്തില്‍ മിനിറ്റുകള്‍ മാത്രമുള്ള രംഗം ചെയ്യാനായി താരം സമ്മതം മൂളിയത്.




മുൻപും അനിരുദ്ധിനെ തേടി നയകവേഷങ്ങള്‍ വന്നിരുന്നെങ്കിലും നിരസിക്കുകയായിരുന്നു. നയന്‍താരയ്ക്ക് മികച്ച നടിക്കുള്ള തമിഴ്‌നാട് സര്‍ക്കാരിന്‍റെ സംസ്ഥാന ചലചിത്രപുരസ്‌കാരം നേടിക്കൊടുത്ത നാനും റൗഡി താന്‍ എന്ന ചിത്രത്തിലേക്കുൾപ്പെടെ അനിരുദ്ധിനെ ആദ്യം പരിഗണിച്ചിരുന്നു. നയന്‍താരയോ ശ്രുതി ഹസനോ നായികയാണെങ്കില്‍ താന്‍ നായകനായി അഭിനയിക്കാം എന്നായിരുന്നു ഒരു അഭിമുഖത്തിനിടെ നായകനായി അഭിനയിക്കുമോ എന്ന ചോദ്യത്തിന് മറുപടിയായി അനിരുദ്ധ് പറഞ്ഞത്.

ശരണ്യ പൊൻവണൻ, യോഗി ബാബു, ജാക്ക്വലീന്‍ തുടങ്ങിയവരാണ് ചിത്രത്തിൽ മറ്റ് പ്രധാന വേഷങ്ങളെ അവതരിപ്പിക്കുന്നത്. തമിഴിലെ ബിഗ്‌ബോസ് ടിവി ഷോയുടെ ക്രിയേറ്റീവ് ഡയറക്ടർ നെൽസൺ ദിലീപ് കുമാർ ആദ്യമായി സംവിധാനം ചെയ്യുന്ന ചിത്രമാണ് ഇത്. ആക്ഷന് പ്രാധാന്യമുള്ള സിനിമയിൽ വേറിട്ട മേക്കോവറിലാകും നയൻസ് എത്തുക.

പ്രമുഖ നിർമാതാക്കളായ ലൈക്ക പ്രൊഡക്ഷൻസാണ് ചിത്രം നിർമിക്കുന്നത്. ഇമൈക്ക നൊടികൾ, കൊലൈയുതിർകാലം, വിശ്വാസം, മലയാളത്തിൽ നിവിൻ പോളി യുമൊത്ത് 'ലവ് ആക്ഷൻ ഡ്രാമ' എന്നിവയാണ് ഈ വർഷമിറങ്ങുന്ന നയൻതാര ചിത്രങ്ങൾ.