വിഘ്‌നേഷ് ശിവന്‍റെ ചിത്രത്തില്‍ കാഴ്ചവൈകല്യമുള്ള നായികയാകാൻ നയൻതാര

തന്‍റെ കാമുകൻ വിഘ്‌നേഷ് ശിവന്‍ ആദ്യമായി നിര്‍മ്മിക്കുന്ന ചിത്രത്തില്‍ നായികയാകാനൊരുങ്ങി തെന്നിന്ത്യൻ ലേഡി സൂപ്പര്‍സ്റ്റാർ നയന്‍താര. ‘നേട്രികണ്‍’ എന്ന് പേരിട്ടിരിക്കുന്ന ചിത്രം സംവിധാനം ചെയ്യുന്നത് മിലിന്ദ് റാവു ആണ്. ചിത്രത്തിന്‍റെ പോസ്റ്റര്‍ നയന്‍താര ട്വിറ്ററിലൂടെ പങ്കുവെച്ചിരിക്കുകയാണ്.

ചിത്രത്തില്‍ കാഴ്ചവൈകല്യമുള്ളൊരു യുവതിയുടെ വേഷത്തിലാകും നയന്‍സ് എത്തുക എന്നാണ് ചില തമിഴ് മാധ്യമങ്ങള്‍ പുറത്തുവിട്ടിരിക്കുന്ന വിവരം. കാഴ്ചവൈകല്യമുള്ളവര്‍ക്ക് വായിക്കാനുള്ള ബ്രെയിൽ അക്ഷരലിപിയാണ് പോസ്റ്ററില്‍ കാണിച്ചിരിക്കുന്നത്. അതിനാല്‍ തന്നെ അന്ധയായ നായികാ രൂപത്തിലാകും നയന്‍സ് എത്തുക എന്നതിന് കൂടുതൽ തെളിവുണ്ട്. ത്രില്ലര്‍ വിഭാഗത്തില്‍പ്പെടുന്ന ചിത്രം റൗഡി പിക്‌ചേഴ്‌സിന്‍റെ ബാനറിലാണ് വിഘ്നേഷ് നിര്‍മിക്കുന്നത്.

രജനികാന്ത് നായകനായി 1981ല്‍ പ്രദര്‍ശനത്തിന് എത്തിയ നേട്രികണ്‍ (മൂന്നാം കണ്ണ്) എന്ന പേര് തന്നെയാണ് നയൻതാരയുടെ സിനിമയ്‍ക്കുമെന്നത് ഏറെ കൗതുകകരമാണ്. തന്‍റെ സിനിമയുടെ പേര് ഉപയോഗിക്കാൻ രജനികാന്ത് സമ്മതം നല്‍കിയിരുന്നുവെന്ന് അണിയറപ്രവര്‍ത്തകര്‍ അറിയിച്ചിട്ടുമുണ്ട്.

നയൻസും വിഘ്‌നേശ് ശിവനുമായുള്ള താരത്തിന്‍റെ വിവാഹവും അടുത്ത വര്‍ഷം ഉണ്ടാകുമെന്ന തരത്തിലുള്ള റിപ്പോര്‍ട്ടുകളും കുറച്ചുനാളുകളായി പ്രചരിക്കുന്നുണ്ട്. രജനികാന്ത് ചിത്രം ‘ദര്‍ബാര്‍’, വിജയ്‌ക്കൊപ്പം ‘ബിഗില്‍’, ചിരഞ്ജീവിയോടൊപ്പം ‘സെയ് റാ നരസിംഹ റെഡ്ഢി’ എന്നീ ചിത്രങ്ങലാണ് നയന്‍താരയുടേതായി ഒരുങ്ങുന്നത്. ‘ലവ് ആക്ഷന്‍ ഡ്രാമ’യാണ് നയന്‍താരയുടേതായി അടുത്തിടെ മലയാളത്തിൽ പുറത്തെത്തിയ ചിത്രം. നിവിൻ നായകനായ ഈ ചിത്രം സമ്മിശ്രപ്രതികരണമാണ് തിയറ്ററുകളിൽ നേടുന്നത്.