പ്രകാശന്‍റേയും കുട്ടുവിന്‍റേയും 'മലര്‍വാടി ആര്‍ട്സ് ക്ലബ്ബ്' പിറന്നിട്ട് പത്ത് വര്‍ഷങ്ങള്‍

മലയാള സിനിമാ ലോകത്ത് പുതുമയുടെ സുഗന്ധം പരത്തിക്കൊണ്ടെത്തിയ 'മലര്‍വാടി ആര്‍ട്സ് ക്ലബ്ബി'ന് ഇന്ന് പത്ത് വയസ്സ്. ഒപ്പം നിവിൻ പോളി ഉള്‍പ്പെടെയുള്ള നിരവധി താരങ്ങളേയും വിനീത് ശ്രീനിവാസൻ എന്ന സംവിധായകനേയും മലയാള സിനിമയ്ക്ക് ലഭിച്ചിട്ടും പത്ത് വര്‍ഷമാകുകയാണ്. 2010 ജൂലൈ പതിനാറിനായിരുന്നു ചിത്രത്തിന്‍റെ റിലീസ്. ഗ്രാൻഡ് പ്രൊഡക്ഷൻസിന്‍റെ ബാനറിൽ നടൻ ദിലീപായിരുന്നു ചിത്രം നിര്‍മ്മിച്ചിരുന്നത്. നിവിൻ പോളി, അജു വര്‍ഗ്ഗീസ്, ഹരികൃഷ്ണൻ, ഭഗത് മാനുവൽ, ശ്രാവൺ എന്നിവരുടെ അരങ്ങേറ്റ ചിത്രമായിരുന്നു. ഇവരെല്ലാം ഇന്ന് മലയാളത്തിലെ മിന്നും താരങ്ങളായി കഴിഞ്ഞു.

Also Read: ഇടി പടങ്ങളുടെ തമ്പുരാൻ; ഷാജി കൈലാസിന്‍റെ 'തീപ്പൊരി' ചിത്രങ്ങൾ ഇവയാണ്!

ആ സമയത്ത് വെങ്കിട്ട് പ്രഭുവിന്‍റെ സിനിമകള്‍ തമിഴിൽ കത്തി കയറുന്ന സമയമാണ്. ചെന്നൈ 600028 ഉം സരോജയുമൊക്കെ തീയേറ്ററിൽ ആളെകൂട്ടുകയാണ്. വിനീത് ആ സമയം ചെന്നൈയിലാണ് താമസം. ആ സിനിമകളിൽ നിന്ന് പ്രചോദനം ഉള്‍ക്കൊണ്ടാണ് മലർവാടി എന്ന ചിന്ത തനിക്കുണ്ടായതെന്ന് വിനീത് നിരവധി അഭിമുഖങ്ങളിൽ പറഞ്ഞിട്ടുണ്ട്. വെങ്കിട്ട് പ്രഭുവിന്‍റെ സിനിമകളിൽ കണ്ട മായാജാലം ഇവിടെ പുതിയ ആളുകളെ വച്ച് ഗ്രാമീണാന്തരീക്ഷത്തിൽ ചെയ്ത് ക്ലിക്കാകുകയായിരുന്നു.

മുമ്പ് ഗായകൻ എന്ന നിലയിൽ പേരെടുത്തിരുന്ന വിനീതിന്‍റെ തിരക്കഥാകൃത്തായും സംവിധായകനുമായുള്ള അരങ്ങേറ്റം കൂടിയായി ചിത്രം. ഉത്തരമലബാറിലെ മനശ്ശേരി ഗ്രാമത്തിലുള്ള മലർ‌വാടി ആർട്സ് ആൻഡ് സ്പോർട്സ് ക്ലബ്ബിലെ അംഗങ്ങളായ അഞ്ചു സുഹൃത്തുക്കളുടെ സുഹൃദ്ബന്ധത്തിന്‍റെ കഥയാണ്‌ ചിത്രം പറഞ്ഞിരുന്നത്. ചിത്രത്തിലെ രണ്ടു നായികാ കഥാപാത്രങ്ങളും പുതുമുഖങ്ങളായിരുന്നു. ഇവരെക്കൂടാതെ ജഗതി ശ്രീകുമാർ, സലീം കുമാർ, നെടുമുടി വേണു, സുരാജ് വെഞ്ഞാറമൂട് തുടങ്ങി നിരവധി താരങ്ങള്‍ ചിത്രത്തിലുണ്ടായിരുന്നു. ഷാൻ റഹ്മാൻ ഒരുക്കിയ ഗാനങ്ങളും ഹിറ്റായിരുന്നു. 2 കോടി മുതൽ മുടക്കിലെത്തിയ ചിത്രം ബോക്സോഫീസിൽ നിന്ന് 8 കോടിയിലേറെ കളക്ട് ചെയ്യുകയുണ്ടായി.

Also Read: ഈ മോളിവുഡ് സ്റ്റാര്‍ കിഡ്‌സ് ഓണ്‍ലൈന്‍ ലോകത്ത് വൈറലാണ്!

ഫോക്കസിൽ ഔട്ടിൽ നിന്ന് ഞങ്ങളെ ഫോക്കസിലോട്ടു പിടിച്ചുയർത്തിയെ ഗുരുവിനു നന്ദി, പത്ത് വര്‍ഷങ്ങള്‍, വാക്കുകള്‍ക്കപ്പുറം എന്ന് കുറിച്ചുകൊണ്ട് പത്താം വാര്‍ഷികത്തിന്‍റെ ഓര്‍മ്മയ്ക്കായി ചിത്രങ്ങള്‍ പങ്കുവെച്ചിരിക്കുകയാണ് നടൻ അജു വര്‍ഗ്ഗീസ്.
Also Watch :