കാത്തിരിപ്പ് ഇനി അധികം നീളില്ല, പ്രഭാസിന്റെ കല്‍കിയുടെ റിലീസ് ഡേറ്റ് പ്രഖ്യാപിച്ചു!

മറ്റൊരു ബ്രഹ്‌മാണ്ഡ ചിത്രവുമായി ബാഹുബലി താരം പ്രഭാസ് തിരിച്ചെത്തുന്നു. നാഗ് അശ്വിന്‍ സംവിധാനം ചെയ്യുന്ന കല്‍കി 2898 എഡി പ്രഖ്യാപിച്ചതു മുതല്‍ വാര്‍ത്തകളില്‍ നിറയുകയാണ്. ഓരോ തവണയും വരുന്ന ചിത്രത്തിന്റെ അപ്‌ഡേഷനുകളെല്ലാം പ്രഭാസ് ആരാധകരെ മാത്രമല്ല, മള്‍ട്ടിസ്റ്റാര്‍ ചിത്രങ്ങള്‍ ആഗ്രഹിക്കുന്ന എല്ലാ സിനിമാപ്രേമികളെയും ആവേശം കൊള്ളിക്കുന്നതായിരുന്നു.

സിനിമയുടെ റിലീസ് തിയ്യതി പുറത്തുവിട്ടതാണ് പുതിയ വിശേഷം. നിര്‍മാതാക്കളായ വൈജയന്തി മൂവീസ് തങ്ങളുടെ ഔദ്യോഗിക ട്വിറ്റര്‍ പേജിലൂടെയാണ് ഡേറ്റ് പുറത്തുവിട്ടിരിക്കുന്നത്. വന്‍ പ്രതീക്ഷയോടെ ഇന്ത്യന്‍ സിനിമാ ലോകം കാത്തിരിയ്ക്കുന്ന കല്‍കി വരുന്ന ജൂണ്‍ 27 ന് തിയേറ്ററുകളിലെത്തും. വന്‍ ബജറ്റിലൊരുക്കുന്ന ചിത്രം തെലുങ്കിന് പുറമെ മറ്റ് ഭാഷകളിലും അതേ ദിവസം തന്നെ റിലീസ് ചെയ്യുന്നതായിരിക്കും

പ്രഭാസിനെക്കൂടാതെ അമിതാഭ് ബച്ചന്‍, കമല്‍ഹാസന്‍, ദീപിക പദുക്കോണ്‍, ജൂനിയര്‍ എന്‍ടിആര്‍, വിജയ് ദേവരക്കൊണ്ട, ദുല്‍ഖര്‍ സല്‍മാന്‍ തുടങ്ങിയ ഒരു വന്‍ താരനിര തന്നെ ചിത്രത്തിലെത്തുന്നുണ്ട്. വൈജയന്തി മൂവീസിന്റെ ബാനറില്‍ സി അശ്വിനി ദത്താണ് 'കല്‍ക്കി 2898 എഡി' നിര്‍മ്മിക്കുന്നത്. പുരാണങ്ങളില്‍ നിന്ന് പ്രചോദനം ഉള്‍ക്കൊണ്ട് ഭാവിയെ തുറന്നുകാണിക്കുന്ന ഒരു സയന്‍സ് ഫിക്ഷനാണ് 'കല്‍ക്കി 2898 എഡി' എന്നാണ് റിപ്പോര്‍ട്ട്.

തമിഴകത്തെ നിരവധി ഹിറ്റ് ഗാനങ്ങള്‍ക്ക് സംഗീതം നല്‍കിയ സന്തോഷ് നാരായണനാണ് 'കല്‍ക്കി 2898 എഡി'യുടെയും പാട്ടുകള്‍ ഒരുക്കുക. സാന്‍ ഡീഗോ കോമിക്-കോണില്‍ കഴിഞ്ഞ വര്‍ഷം നടന്ന തകര്‍പ്പന്‍ അരങ്ങേറ്റത്തിന് ശേഷം ആഗോളതലത്തില്‍ ശ്രദ്ധയാകര്‍ഷിച്ച ഈ ചിത്രം വന്‍ പ്രതീക്ഷയോടെയാണ് പ്രേക്ഷകര്‍ നോക്കികാണുന്നത്. പി ആര്‍ ഒ ആതിര ദില്‍ജിത്ത്.