പ്രണവ് ദാ ഇവിടുണ്ട്; 'ആദി'യുടെ ലൊക്കേഷൻ വിശേഷങ്ങൾ

താരപുത്രൻ പ്രണവ് മോഹൻലാൽ ആദ്യമായി നായകനാകുന്ന മലയാള ചിത്രത്തിന്‍റെ ഷൂട്ടിങ്ങ് ബെംഗലൂരുവിലേക്ക് മാറ്റി. സംവിധായകൻ ജിത്തു ജോസഫാണ് ഇക്കാര്യം അറിയിച്ചത്. ആഗസ്റ്റ് ഒന്നിനാണ് ചിത്രത്തിന്‍റെ ഷൂട്ടിങ് കൊച്ചിയിൽ ആരംഭിച്ചത്. അവിടെ ആദ്യ ഷെ‍ഡ്യൂൾ പൂർത്തിയാക്കിയ ശേഷമാണ് രണ്ടാം ഷെഡ്യൂളിനായി ലൊക്കേഷൻ ബെംഗലൂരുവിലേക്ക് മാറ്റിയത്.

തന്‍റെ മുൻ ചിത്രങ്ങളെ പോലെ റിവെഞ്ച് ത്രില്ലർ, സസ്പെൻസ് ത്രില്ലർ എന്നീ വിഭാഗങ്ങളിലൊന്നും ആദിയെ ഉൾപ്പെടുത്താൻ സാധിക്കില്ലെന്നും പൂര്‍ണമായും പ്രേക്ഷകരെ തൃപ്തിപ്പെടുത്തുന്ന തികഞ്ഞ എെന്‍റർടെയ്നറാണ് ചിത്രമെന്നും ജിത്തു ജോസഫ് വ്യക്തമാക്കി.




മുഖ്യമായും മൂന്ന് സ്ത്രീകഥാപാത്രങ്ങളാണ് ചിത്രത്തിലുള്ളത്. ലെന, അനുശ്രീ, 'അലമാര' ഫെയിം അദിതി രവി എന്നിവരാണ് ഈ കഥാപാത്രങ്ങളെ അവതരിപ്പിക്കുന്നത്. എന്നാൽ ഇവരാരുമല്ല പ്രണവിന്‍റെ നായിക എന്നതാണ് ശ്രദ്ധേയം. ചിത്രത്തിൽ പ്രണവ് അവതരിപ്പിക്കുന്ന കഥാപാത്രത്തിന്‍റെ പേര് തന്നെയാണ് ചിത്രത്തിന്‍റേത്. ഈ കഥാപാത്രത്തെ കുറിച്ചും ചിത്രത്തിലെ മറ്റു കഥാപാത്രങ്ങളെ കുറിച്ചും ഇപ്പോൾ അധികമൊന്നും തന്നെ പറയാൻ സാധിക്കില്ലെന്നും ജീത്തു ജോസഫ് പറഞ്ഞു. വിദേശത്ത് ചിത്രീകരണമില്ലെന്നും സംവിധായകൻ വ്യക്തമാക്കി.

സതീഷ് കുറുപ്പാണ് ചിത്രത്തിന്‍റെ ഛായാഗ്രഹണം നിർവ്വഹിക്കുന്നത് . സിനിമയിൽ സിദ്ധിഖ് ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഷിജു വിൽസൺ, ഷറഫുദ്ദീൻ, നോബി, ടോണി ലൂക് എന്നീ യുവ താരങ്ങളും ചിത്രത്തിൽ അണിനിരക്കുന്നുണ്ട്.

Pranav Mohanlal's 'Aadhi Movie' shoot shifted to Banglore

Pranav Mohanlal's first screen presence acting 'Aadhi Movie' shoot Banglore