പ്രീതി സിന്‍റെ ലോസ് ആഞ്ചലസിൽ വിവാഹിതയായി

ലോസ് ആഞ്ചലസ്: ബോളിവുഡ് നടി പ്രീതി സിന്‍റെയും കാമുകൻ ജീൻ ഗുഡ്നോയും ലോസ് ആഞ്ചലസിൽ വിവാഹിതയായി. ഫെബ്രുവരി 28നാണ് ഇരുവരും വിവാഹിതരായതെന്ന് ഫിലിംഫെയർ. കോം റിപ്പോർട്ട് ചെയ്തു. പ്രീതിയുടേയും ജീനിന്‍റെയും അടുത്ത ബന്ധുക്കളും സുഹൃത്തുക്കളും മാത്രമാണ് വിവാഹത്തിൽ പങ്കെടുത്തത്. പ്രീതിയുടെ വിവാഹം സംബന്ധിച്ച് കഴിഞ്ഞ ഒരു മാസമായി വാർത്തകൾ വരുന്നുണ്ടെങ്കിലും താരം ഒന്നും സ്ഥിരീകരിച്ചിരുന്നില്ല.

എന്നാൽ പ്രീതിയുടെ അടുത്ത സുഹൃത്തുക്കളായ സുസൈൻ ഖാൻ, സുരീലി ഗോയൽ എന്നിവ‍ർ കഴിഞ്ഞ ദിവസം ലാറ്റിൻ അമേരിക്കയിൽ നിന്ന് നിരവധി ചിത്രങ്ങൾ സോഷ്യൽ സൈറ്റുകളിലൂടെ പോസ്റ്റ് ചെയ്തിരുന്നു. ഇതേ തുടർന്നാണ് പ്രീതിയുടെ വിവാഹം അമേരിക്കയിലായിരിക്കുമെന്ന അഭ്യൂഹങ്ങൾ പരന്നത്. ക്രിസ്ത്യൻ ആചാരപ്രകാരമായിരിക്കും വിവാഹമെന്നും വാർത്തകൾ ഉണ്ടായിരുന്നു. എന്തായാലും ഏപ്രിൽ മാസത്തിൽ പ്രീതി ഇന്ത്യയിലെത്തിക്കഴിഞ്ഞാൽ ഹിന്ദു ആചാരപ്രകാരം വിവാഹിതയാകുമെന്നാണ് ബി ടൗണിൽ കേൾക്കുന്ന മറ്റൊരു വാർത്ത. കാത്തിരുന്നു കാണുക തന്നെ.