‘മൈ സ്റ്റോറി’ ട്രെയിലര്‍ എത്തി; പുറത്തുവിട്ടത് മമ്മൂട്ടി

പാര്‍വ്വതിയും പൃഥ്വിരാജും മുഖ്യ വേഷങ്ങളെ അവതരിപ്പിക്കുന്ന ‘മൈ സ്റ്റോറി’യുടെ ട്രെയിലര്‍ പുറത്തു വിട്ടു. നടൻ മമ്മൂട്ടിയാണ് ട്രെയിലര്‍ പുറത്തുവിട്ടത്. തന്‍റെ ഫേസ്ബുക്ക് പേജിലൂടെ ചിത്രത്തിന്‍റെ ട്രെയിലര്‍ ആരാധകര്‍ക്കായി പുറത്തുവിടുകയായിരുന്നു. മുൻപ് പുറത്തിറങ്ങിയ മൈ സ്റ്റോറിയിലെ ഗാനത്തിനെതിരെ മമ്മൂട്ടി ആരാധകര്‍ ഡിസ്‌ലൈക്ക് ക്യാമ്പയിന്‍ നടത്തിയിരുന്നു. ഈ പശ്ചാത്തലത്തിലാണ് മമ്മൂട്ടിയുടെ ഫേസ്ബുക്ക് പേജിലൂടെ ചിത്രത്തിന്‍റെ പുതിയ ട്രെയിലര്‍ പുറത്തിറക്കിയിരിക്കുന്നതെന്നതാണ് ശ്രദ്ധേയം. ​ എന്നാൽ നിലവിൽ മമ്മൂട്ടിയുടെ ഫേസ്ബുക്ക് പോസ്റ്റ് അപ്രത്യക്ഷമായിരിക്കുന്നു എന്നുള്ളതാണ് വാസ്തവം.



മുൻപ് പൃഥ്വിരാജും പാര്‍വതിയും ഒന്നിച്ച ‘എന്ന് നിന്‍റെ മൊയ്തീന്’ ശേഷം ഇരുവരും ചേര്‍ന്ന് പ്രവര്‍ത്തിക്കുന്ന ചിത്രമാണിത്. വസ്ത്രാലങ്കാര മേഖലയിൽ വ്യക്തിമുദ്ര പതിപ്പിച്ച റോഷ്ണി ദിനകര്‍ ആദ്യമായി സംവിധാനം ചെയ്യുന്ന ചിത്രമാണ് മൈ സ്റ്റോറി. ചിത്രത്തില്‍ ജയ് എന്ന കഥാപാത്രമായി പൃഥ്വിരാജെത്തുമ്പോൾ താരയായി പാര്‍വ്വതി എത്തുന്നു. ശങ്കര്‍ രാമകൃഷ്ണനാണ് ചിത്രത്തിനായി തിരക്കഥ ഒരുക്കിയിരിക്കുന്നത്. റോഷ്ണി ദിനകര്‍ തന്നെയാണ് ചിത്രം നിര്‍മ്മിക്കുന്നത്.