കഴിഞ്ഞ വര്ഷത്തെ ബ്ലോക്ക് ബസ്റ്റര് ചിത്രമായിരുന്നു ലൂസിഫര്. ലൂസിഫറിൻ്റെ രണ്ടാം ഭാഗം പ്രഖ്യാപിച്ചപ്പോൾ മുതൽ ആരാധകര് ഏറെ പ്രതീക്ഷയിലാണ്. ചിത്രത്തിൻ്റെ തിരക്കഥയുടെ ഓരോ ഘട്ടങ്ങളും അനുദിനം വികസിച്ചു കൊണ്ടിരിക്കുകയാണ് ഇപ്പോൾ. ചിത്രത്തെ കുറിച്ചുള്ള പുതിയ വിവരം ആരാധകരുമായി പങ്കുവെച്ചിരിക്കുകയാണ് പൃഥ്വിരാജ്. ഇരുന്നൂറു കോടി നേടിയ മലയാളത്തിലെ ആദ്യ ചിത്രം എന്ന ഖ്യാതി തൻ്റെ ആദ്യ സംവിധാന സംരംഭ ചിത്രത്തിലൂടെ തന്നെ സ്വന്തമാക്കിയ പൃഥ്വിരാജ് എമ്പുരാൻ എന്ന ചിത്രം തനിക്ക് സമ്മാനിക്കുന്ന സമ്മര്ദ്ദത്തെ കുറിച്ച് വെളിപ്പെടുത്തുകയാണ് ഇപ്പോൾ.
ലൂസിഫര് പോലത്ര എളുപ്പമല്ല
എമ്പുരാൻ വലിയൊരു കടമ്പയാണ്. ലൂസിഫറിൽ എപ്പോഴുമൊരു സര്പ്രൈസ് ഫാക്ടറുണ്ടായിരുന്നു. പ്രേക്ഷകര്ക്ക് ഞാനെന്താണ് ചെയ്യുന്നതെന്നോ എന്താകും ചെയ്യാൻ പോകുന്നതെന്നോ എന്താണ് അണിയറയിൽ ഒരുങ്ങുന്നതെന്നോ ഒരു ഊഹവുമുണ്ടായിരുന്നില്ല.
എമ്പുരാൻ വന്നപ്പോൾ സ്ഥിതി മാറി
സിനിമാ ഇൻഡസ്ട്രിയിലുള്ളവര് ഒരുപക്ഷേ അറിഞ്ഞിരുന്നിരിക്കാം. പക്ഷേ ലൂസിഫര് പോലൊരു വമ്പൻ ഹിറ്റ് സിനിമ സമ്മാനിച്ച ശേഷം ഞാൻ മറ്റൊരു സിനിമയുമായി എത്തുമ്പോൾ പ്രേക്ഷകര് അത്രത്തോളം പ്രതീക്ഷയോടെയാകും തീയേറ്ററുകളിലേക്കെത്തുന്നത്.
വലിയ സമ്മർദ്ദം
അതുകൊണ്ടു തന്നെ എമ്പുരാൻ നൽകുന്ന ഒരു സമ്മര്ദ്ദം എന്നത് വളരെ വലുതാണ്. ലൂസിഫറിനേക്കാൾ വളരെ വലുത്. വളരെ കാഠിന്യമേറിയ ഒരു ജോലിയാകുമെന്ന ഉത്തമ ബോധ്യമുണ്ട്.
ഞാനെൻ്റെ മാക്സിമം പുറത്തെടുക്കും
പ്രേക്ഷകരുടെ പ്രതീക്ഷകൾക്കൊത്തുള്ള ഒരു സിനിമ തന്നെയാകണം എമ്പുരാൻ, കാഴ്ചയിലും മേക്കിങ്ങിലും അടക്കം അതങ്ങനെ തന്നെയാകണം. ഞാനെൻ്റെ മാക്സിമം അതിനായി പ്രയത്നിക്കും. പൃഥ്വിരാജ് പറഞ്ഞു