മുത്തശ്ശിക്ക് യാത്ര നൽകാൻ പ്രിയങ്ക ചോപ്ര കോട്ടയത്തെത്തി

ബോളിവുഡ് താരം പ്രിയങ്ക ചോപ്രയുടെ മുത്തശ്ശി മേരി ജോണ്‍ അഖൗരി(74)യുടെ സംസ്കാരം പൊന്‍കുന്നം സെന്റ് തോമസ് യാക്കോബ പള്ളിയില്‍ നടത്തി. പ്രിയങ്ക ചോപ്ര, സഹോദരന്‍ സിദ്ധാര്‍ത്ഥ് ചോപ്ര, മാതാവ് മധു അശോക് ചോപ്ര എന്നിവരുള്‍പ്പെടെ അടുത്ത ബന്ധുക്കളെല്ലാം പൊന്‍കുന്നത്ത് സംസ്കാര ചടങ്ങിന് എത്തിയിരുന്നു.

പ്രിയങ്കയുടെ മാതാവ് മധു അശോക് ചോപ്രയുടെ മാതാവാണ് മേരി അഖൗരി. മേരി ജോണ്‍ കുമരകം കവളപ്പാറ കുടുംബാംഗമാണ്. സംസ്കാരം സ്വദേശത്തു നടത്തണമെന്ന് ഇവര്‍ നേരത്തെ ബന്ധുക്കളെ അറിയിച്ചിരുന്നു. കഴിഞ്ഞ ദിവസം മുംബൈയിലാണ് മേരി അഖൗരി നിര്യാതയായത്.

കോട്ടയം ഭദ്രാസനാധിപന്‍ തോമസ് മാര്‍ തിമോത്തിയോസ് മെത്രാപ്പൊലീത്ത സംസ്കാര ശുശ്രൂഷകള്‍ക്ക് നേതൃത്വം നല്‍കി. മക്കളും പ്രിയങ്ക ചോപ്ര ഉള്‍പ്പെടെയുള്ള പേരക്കുട്ടികളും ഭര്‍ത്താവ് അഖൗരിയുടെ ബന്ധുക്കളും അടുത്ത സുഹൃത്തുക്കളും സംസ്കാര ചടങ്ങില്‍ പങ്കെടുത്തു.