മലയിറങ്ങുന്നുണ്ടേ 'പുലിമുരുകൻ'; പുതിയ ലുക്ക് എത്തി

പുലികളോട് പോരാടി ജീവിക്കുന്ന മുരുകൻ എന്ന സാധാരണക്കാരന്‍റെ അസാധാരണ ജീവിതം പറയുന്ന 'പുലിമുരുകൻ' എന്ന ചിത്രത്തിലെ ലാലിന്റെ ലൊക്കേഷൻ ലുക്ക് തരംഗമാകുന്നു. മരക്കുറ്റി ചുമന്ന് മലയിറങ്ങുന്ന ലാലിന്റെ ചിത്രമാണിത്. മലയാളത്തിൽ ഏറെ പുതുമകളുമായെത്തുന്ന സിനിമ വൈശാഖാണ് സംവിധാനം ചെയ്യുന്നത്. തിരക്കഥ ഉദയ്കൃഷ്ണ. മലയാളത്തിലെ ഏറ്റവും ബിഗ് ബജറ്റ് ക്യാന്‍‌വാസിലാണ് ചിത്രം ഒരുക്കുന്നത്.

തെന്നിന്ത്യന്‍ സിനിമയിലെ ഏറ്റവും വലിയ ആക്ഷന്‍ കോറിയോഗ്രാഫര്‍ പീറ്റര്‍ ഹെയ്‌ന്‍ ആണ് ഈ സിനിമയിലെ സ്റ്റണ്ട് രംഗങ്ങള്‍ സംവിധാനം ചെയ്തിരിക്കുന്നത്. ടോമിച്ചന്‍ മുളകുപ്പാടം നിര്‍മ്മിക്കുന്ന ചിത്രം ക്രിസ്മസ് റിലീസാണ്. ഏറെ കഠിനാദ്ധ്വാനം ചെയ്താണ് പുലിമുരുകന്‍ എന്ന കഥാപാത്രത്തിനായി മോഹന്‍ലാല്‍ ഒരുങ്ങിയിരിക്കുന്നത്. മോഹന്‍ലാലിന്‍റെ അഭിനയജീവിതത്തിലെ തന്നെ ഏറ്റവും സാഹസികമായ സ്റ്റണ്ടുരംഗങ്ങള്‍ ഈ സിനിമയില്‍ ദര്‍ശിക്കാനാവും.