കാശുള്ളവർ കേസിൽ നിന്ന് രക്ഷപെടുമെന്ന് പൾസർ സുനി

കൊച്ചി: നടി ആക്രമിക്കപ്പെട്ട കേസിൽ നിന്ന് കാശുള്ളവർ രക്ഷപെട്ടു പോകുമെന്ന് പ്രതി പൾസർ സുനി. കേസിൽ ഇപ്പോൾ താൻ മാത്രമായെന്നും സുനിൽ കുമാർ പറഞ്ഞു. കേസിലെ പ്രധാന തെളിവായ മെമ്മറി കാർഡ് ആവശ്യപ്പെട്ട് ദിലീപ് സമർപ്പിച്ച ഹർജി അങ്കമാലി മജിസ്‌ട്രേറ്റ് കോടതി തള്ളി. കേസിന്‍റെ വിചാരണ എറണാകുളം ജില്ലാ സെഷൻസ് കോടതിയിലേക്ക് മാറ്റി. കേസിലെ സുപ്രധാന തെളിവുകൾ ദിലീപിന് നൽകരുതെന്ന പ്രോസിക്യൂഷൻ വാദം അങ്കമാലി കോടതി അംഗീകരിച്ചു.

അങ്കമാലി മജിസ്‌ട്രേറ്റ് കോടതിയിൽ ഹാജറായപ്പോഴാണ് പൾസർ സുനിയുടെ പ്രതികരണം. കേസിലെ എല്ലാ പ്രതികളും ഇന്ന് ഹാജരാകണമെന്ന് കോടതി ആവശ്യപ്പെട്ടിരുന്നു. നടി ആക്രമിക്കപ്പെട്ട കേസിൽ പ്രധാന തെളിവായ മെമ്മറി കാർഡ് ആവശ്യപ്പെട്ട് ദിലീപ് നൽകിയ ഹർജിയിലാണ് ഇന്ന് വിധി വന്നത്. ദിലീപിന് മെമ്മറി കാർഡ് നൽകുന്നത് നടിയുടെ ജീവന് ഭീഷണിയാണെന്ന പ്രോസിക്യൂഷൻ വാദം കോടതി അംഗീകരിച്ചു.

പോലീസ് കുറ്റപത്രത്തിനൊപ്പം സമർപ്പിച്ച എല്ലാ രേഖകളും ദിലീപ് ആവശ്യപ്പെട്ടിരുന്നു. വിചാരണ സമയത്ത് പോലീസ് സമർപ്പിച്ച രേഖകളുടെയും തെളിവുകളുടെയും പട്ടിക കോടതി ആവശ്യപ്പെട്ടിരുന്നു. പട്ടികയിലുള്ളത് പ്രകാരം ഗൗരവ സ്വഭാവമില്ലാത്ത രേഖകൾ പോലീസ് പ്രതിഭാഗത്തിന് കൈമാറി.