ഇത് പൊരിക്കും; 'പുത്തൻപണം' വെടിച്ചില്ല് ട്രെയിലർ

മാസ്സും ക്ലാസ്സും ഒന്നൊച്ചൊരു പൊളപ്പൻ ഐറ്റം. അതാണ് 'പുത്തൻ പണം' ട്രെയിലർ. മമ്മൂട്ടിയും ര‌ഞ്ജിത്തും ഒന്നിച്ചപ്പോഴേ ഹിറ്റ് മണത്തിരുന്നു. ഇപ്പോൾ ട്രെയിലർ കൂടി ഇറങ്ങിയതോടെ പ്രതീക്ഷകൾ ആകാശം മുട്ടിയിരിക്കുകയാണ്. ഏബ്രഹാം മാത്യു, രഞ്ജിത്, അരുൺ നാരായണൻ എന്നിവർ ചേർന്നു നിർമിക്കുന്ന ഈ ചിത്രത്തിന്റെ റിലീസ് ഏപ്രിൽ 12നാണ്.

രഞ്ജിത്തിന്റെ ചിത്രങ്ങൾ എപ്പോഴും വ്യത്യസ്തവും കൗതുകം ജനിപ്പിക്കുന്നതും നിത്യജീവിതവുമായി ബന്ധമുള്ളതുമായിരിക്കും. കഴിഞ്ഞവർഷം അവസാനം ജനങ്ങളെ ഏറെ ബാധിച്ച നോട്ട് നിരോധനം വിഷയമാക്കിയാണ് ചിത്രമെന്ന് ട്രെയിലർ പറഞ്ഞുവയ്ക്കുന്നു.



നിത്യാനന്ദ ഷേണായി എന്ന കഥാപാത്രത്തെയാണ് മമ്മൂട്ടി ഈ ചിത്രത്തിൽ അവതരിപ്പിക്കുന്നത്. ഒരു പുത്തൻ പണക്കാരന്റെ നെഗളിപ്പും പൊങ്ങച്ചവുമൊക്കെ വ്യക്‌തമായി പ്രകടിപ്പിക്കുന്ന രൂപവും വേഷവുമൊക്കെയായാണ് ഈ കഥാപാത്രം എത്തുന്നത്. കാസറഗോഡൻ ഭാഷയിലാണ് മമ്മൂട്ടിയുടെ സംസാരമെന്നത് കൗതുകം ജനിപ്പിക്കും.

ഇനിയ, ഷീലു ഏബ്രഹാം എന്നിവരാണു നായികമാർ. മാസ്റ്റർ സ്വരാജ് ഈ ചിത്രത്തിലെ മറ്റൊരു സുപ്രധാന കഥാപാത്രത്തെ അവതരിപ്പിക്കുന്നു. സായ്കുമാർ, സിദ്ധിഖ്, രഞ്ജി പണിക്കർ, മാമുക്കോയ, ഇന്ദ്രൻസ്, അബു സലിം, ഹരീഷ് കണാരൻ, നിർമൽ പാലാഴി, സിറാജ് പയ്യോളി, സോഹൻ സീനുലാൽ, പി. ബാലചന്ദ്രൻ തുടങ്ങിയവരും ഈ ചിത്രത്തിലെ പ്രധാന താരങ്ങളാണ്. ഷഹബാസ് അമന്റേതാണു സംഗീതം. ഓം പ്രകാശാണു ഛായാഗ്രാഹകൻ. എഡിറ്റിംഗ്– മനോജ് കണ്ണോത്ത്.

Puthan Panam
Puthan Panam Theatrical Trailer