'ഞാനും ആ സംവിധായകന്‍റെ ഇര'യെന്ന് രചന

നടി നിഷ സാരംഗ് 'ഉപ്പും മുളകും' സംവിധായകനെതിരെ രംഗത്ത് വന്നതിന് പിന്നാലെ നടി രചന നാരായണന്‍കുട്ടിയും ഇതേ സംവിധായകനെതിരെ രംഗത്ത്. ഉണ്ണികൃഷ്ണൻ എന്ന ഈ സംവിധായകന്‍റെ ഈഗോയുടെ ഇരയാണ് താനെന്നാണ് രചന ആരോപിച്ചിരിക്കുന്നത്. മറിമായം ആക്ഷേപഹാസ്യ പരമ്പരയുടെയും സംവിധായകൻ ഇതേ ആളായിരുന്നു.

ആ സമയത്ത് താൻ സിനിമയില്‍ അഭിനയിക്കാന്‍ തുടങ്ങിയപ്പോള്‍ സംവിധായകന് ഈഗോ പ്രശ്നങ്ങള്‍ ഉടലെടുക്കുകയായിരുന്നുവെന്ന് രചന വ്യക്തമാക്കുന്നു. തന്നേയും സഹതാരമായ വിനോദ് കോവൂരിനെയും അത്തരത്തിൽ തിരഞ്ഞുപിടിച്ച് പരമ്പരയിൽ നിന്ന് ഒഴിവാക്കാൻ നോക്കുകയായിരുന്നു ഇദ്ദേഹമെന്ന് രചന പറയുന്നു.

സീരിയൽ ചിത്രീകരണത്തിനിടെ മോശമായി പെരുമാറിയപ്പോള്‍ എതിര്‍ത്ത തന്നോട് സംവിധായകന്‍ പക വച്ച് പെരുമാറുന്നുവെന്നും കാരണം കൂടാതെ സീരിയലില്‍ നിന്ന് നീക്കിയെന്നുമായിരുന്നു നിഷ സാംരഗ് വെളിപ്പെടുത്തിയിരുന്നത്. ഈ സംവിധായകന്‍ ഉള്ളിടത്തോളം താനിനി ആ സീരിയലിലേക്കില്ലെന്നും നിഷ ഒരു ചാനലിന് നല്‍കിയ അഭിമുഖത്തില്‍ വ്യക്തമാക്കിയിരുന്നു.