തരംഗമാകാൻ എത്തി രാജ സ്റ്റൈൽ മുണ്ട്

മമ്മൂട്ടിയുടെ സൂപ്പർ ഹിറ്റായ ഒരുപടമായിരുന്നു പോക്കിരി രാജ. ചിത്രത്തിന്‍റെ രണ്ടാം ഭാഗമായ രാജ 2 വിന്‍റെ ഒരുക്കങ്ങൾ അണിയറയിൽ പുരോഗമിച്ചു കൊണ്ടിരിക്കുകയാണ്. അതിനിടെ മമ്മൂട്ടിയുടെ കഥാപാത്രമായ മധുര രാജ ഉപയോഗിക്കുന്ന മുണ്ട് സാമൂഹ്യ മാധ്യമങ്ങളിൽ വൈറലാവുകയാണ്. ചിത്രത്തിന്‍റെ അണിയറ പ്രവർത്തകർ ആണ് മുണ്ടിന്‍റെ ചിത്രം ഫേസ്ബുക്ക് പേജിലൂടെ പങ്കുവെച്ചത്.


വീതിയുള്ള കരയും അതിൽ ഡിസൈനുമായി എത്തിയിട്ടുള്ള മുണ്ട് ഇതിനകം തന്നെ ആരാധകർ ഏറ്റെടുത്തു. ആട് ഒരു ഭീകര ജീവിയല്ല, ആട് 2 എന്ന ചിത്രത്തിലൂടെ ഷാജി പാപ്പൻ മാത്രമല്ല പാപ്പന്‍റെ മുണ്ടും തരംഗം സൃഷ്ടിച്ചിരുന്നു. അതുപോലെ മധുര രാജയെ സ്വീകരിച്ച പ്രേക്ഷകർ രാജ സ്റ്റൈൽ മുണ്ടും സ്വീകരിക്കും എന്ന ഉറച്ചവിശ്വാസത്തിലാണ് അണിയറപ്രവർത്തകർ.

രണ്ടാം ഭാഗത്തിന് രാജ 2 എന്നാണ് പേരിട്ടതെങ്കിലും പോക്കിരി രാജയുടെ തുടർച്ചയായിരിക്കില്ല എന്നാണ് അണിയറ പ്രവർത്തകർ പറയുന്നത്. ഉദയകൃഷ്ണയുടെ തിരക്കഥയിൽ ഒരുങ്ങുന്ന ചിത്രം നിർമ്മിക്കുന്നത് നെല്‍സണ്‍ ഐപ്പാണ്. ഗോപി സുന്ദറാണ് ചിത്രത്തിന് സംഗീതം ഒരുക്കുന്നത്.