പാട്ടുപാടി ധര്‍മ്മജൻ; ട്രോളിലൂടെ ആശംസിച്ച് പിഷാരടി

പരസ്പരം 'പണികൾ' കൊണ്ടും കൊടുത്തും കഴിയുന്ന സിനിമാതാരങ്ങളായ ധര്‍മ്മജൻ ബോൾഗാട്ടി പുതിയ വേഷം അണിയുകയാണ്. നടനും നിര്‍മ്മാതാവുമായ ധര്‍മ്മജൻ ഇനി സിനിമ പിന്നണി ഗാനരംഗത്തേക്ക് ചുവടുവെക്കുകയാണ്. ധര്‍മ്മജൻ നിര്‍മ്മിക്കുന്ന നിത്യഹരിത നായകൻ എന്ന ചിത്രത്തിനായാണ് താൻ പിന്നണി പാടുന്നത്.

ഇതോടെ ധര്‍മ്മജന്‍ ബോള്‍ഗാട്ടിക്ക് ആശംസകള്‍ അറിയിച്ചു കൊണ്ട് രമേശ് പിഷാരടി രംഗത്തെത്തി ട്രോളിൽ നിറഞ്ഞതാണ് ആശംസ. തൻ്റെ ഫെയ്‌സ്ബുക്ക് അക്കൗണ്ടിലൂടെയാണ് പിഷാരടി പ്രിയ സുഹൃത്തിന് ആശംസകള്‍ അറിയിച്ചത്. നിത്യ ഹരിത നായകൻ്റെ പോസ്റ്റര്‍ അടക്കം താരം ഷെയര്‍ ചെയ്തിട്ടുണ്ട്. ഇന്ന് വൈകിട്ട് പിഷാരടിയുടെ പേജിലൂടെ ധ‍ര്‍മ്മജൻ പാടിയ ഗാനം പുറത്ത് വിട്ടു. വിവരമറിയിച്ചു കൊണ്ട് പോസ്റ്റര്‍ ഷെയര്‍ ചെയ്ത പിഷാരടി ഇങ്ങനെ കുറിച്ചു.

'അറിഞ്ഞിരുന്നില്ല എന്നോടാരും പറഞ്ഞതുമില്ല..ദേവി കടാക്ഷം ആവോളം കിട്ടിയിട്ടുണ്ടെന്നു.എത്രയോ സ്റ്റേജുകളില്‍ ഒപ്പം കയറിയപ്പോഴും ഒരു മൂളിപാട്ടു പോലും ലൈവായി പാടിക്കാതെ ഞാന്‍ കാത്തു സൂക്ഷിച്ചതാ..24 നു എൻ്റെ പേജില്‍ കൂടെ തന്നെ. പ്രതികാരദാഹി ആണവന്‍'