'തൊട്ടടുത്തിരുന്ന പോലെ, പരിചയപ്പെടേണ്ടായിരുന്നു എന്ന് തോന്നുന്നു ഇപ്പോൾ, എന്റെ അനിലേട്ടാ സഹീക്കാനാകുന്നില്ലെ'ന്ന് രഞ്ജിൻ രാജ്!

രഞ്ജിൻ രാജിൻ്റെ കുറിപ്പിൻ്റെ പൂർണ്ണ രൂപം കാണാം. അതിങ്ങനെയാണ്. 'എന്റെ അനിലേട്ടാ. അവസാനഗാനം എനിക്കായി തന്ന്, സ്നേഹിച്ച്‌, ശകാരിച്ച്‌ നിങ്ങൾ യാത്രയായല്ലെ?? കഴിഞ്ഞ ദിവസങ്ങളിൽ നിങ്ങൾ തന്ന സ്നേഹം, ഫോണിന് അപ്പുറമായിരുന്നാലും, തൊട്ടടുത്തിരുന്ന പോലെ.'

'പരിചയപ്പെടേണ്ടായിരുന്നു എന്ന് തോന്നുന്നു ഇപ്പോൾ. സഹിക്കാനാവാത്ത വാർത്ത.' രഞ്ജിൻ രാജിൻ്റെ വാക്കുകൾ സോഷ്യൽ മീഡിയയിലെ ആരാധകരൊക്കെ ഏറ്റെടുത്തിരിക്കുകയാണ്. പ്രിയ കവിയുടെ വിയോഗത്തിൽ സിനിമാ ലോകം ഒട്ടാകെ നെടുവീർപ്പെടുകയാണ്.

സിനിമാ താരങ്ങളായ പൃഥ്വിരാജ് സുകുമാരൻ, ടൊവിനോ തോമസ്, ഉണ്ണി മുകുന്ദൻ, ആസിഫ് അലി, അജു വർഗ്ഗീസ്, പ്രവീൺ പ്രേം ഗാനരചയിതാവ് വിനായക് ശശികുമാർ എന്നിവരുമൊക്കെ പ്രിയ കവിയുടെ വിയോഗത്തിൽ ആദരാഞ്ജലികൾ കുറിച്ച് രംഗത്തെത്തിയിട്ടുണ്ട്.

2021ലെ ആദ്യ സെലിബ്രിറ്റി വിയോഗമാണെന്നും കഴിഞ്ഞ വർഷത്തിൻ്റെ തുടർച്ചയാകുകയാണോ ഈ വർഷമെന്നും തുടക്കത്തിൽ തന്നെ പ്രിയപ്പെട്ടവരുടെ വിയോഗമാണല്ലോ എന്നും സോഷ്യൽ മീഡിയ ചോദിക്കുന്നുണ്ട്. കൊവിഡിനെ തുടർന്ന് ചികിത്സയിൽ കഴിയവെ കവിയ്ക്ക് ഹൃദയാഘാതം സംഭവിക്കുകയായിരുന്നു. അത് മരണത്തിന് കാരണമാകുകയായിരുന്നു.

'ഒരാഴ്ച്ചത്തെ മാത്രം അടുപ്പം, ഒരുപാട്‌ വർഷത്തേത്‌ എന്ന് തോന്നിപ്പിച്ച ബന്ധം. ആരോഗ്യവും കുടുംബവും നോക്കിയിട്ടൊക്കെ മതി ബാക്കിയെല്ലാം എന്ന് എന്നെ ഒരുപാടു തവണ ഓർമിപ്പിച്ചു, ഒമ്പത്‌ മണി കഴിഞ്ഞാൽ, കഴിഞ്ഞ ഒരാഴ്ച്ചയായ്‌ നിർബന്ധപൂർവം സ്റ്റുഡിയോയിൽ നിന്നും ഫോണിലൂടെ ശകാരിച്ച്‌ വീട്ടിലേക്കയക്കും. അനിലേട്ടാ വിശ്വസിക്കാനാവുന്നില്ല. സ്നേഹത്തിന്റെ നിറകുടം തന്നെയായിരുന്നു അനിലേട്ടൻ.'