'രുദാലി'യുടെ സംവിധായിക കല്‍പ്പന ലാജ്മി അന്തരിച്ചു

വെള്ളിത്തിരയിൽ രുദാലികളുടെ ജീവിതം കോറിയിട്ട സംവിധായിക കല്‍പ്പന ലാജ്‌മി അന്തരിച്ചു. പുലര്‍ച്ചെ 4.30 ന് മുംബൈ കോകിലബാന്‍ ഹോസ്പിറ്റലില്‍ ആയിരുന്നു 61 വയസ്സുകാരികല്‍പ്പന ലാജ്മിയുടെ അന്ത്യം. വൃക്ക സംബന്ധമായ അസുഖത്തെ തുടര്‍ന്ന് ഏറെ നാളായി ചികിത്സയിലായിരുന്നു. ഉച്ചയ്ക്ക് ഒരു മണിയോടെ ഓഷിവാരാ ക്രിമറ്റോറിയത്തില്‍ സംസ്കാരചടങ്ങുകള്‍ നടക്കും.

കല്‍പ്പനയുടെ അവസാനചിത്രം 2006 ല്‍ പുറത്തിറങ്ങിയ 'ചിങ്കാരി' ആണ്. മിഥുന്‍ ചക്രവര്‍ത്തി, സുസ്മിത സെന്‍ എന്നിവരായിരുന്നു ചിത്രത്തിൽ അഭനയിച്ചവ‍ർ. വിഖ്യാത സംവിധായകൻ ശ്യാം ബെനഗലിൻ്റെ അസിസ്റ്റന്റ് ഡയറക്ടര്‍ ആയാണ് കല്‍പ്പന സിനിമയിലെത്തിയത്. ഏക് പല്‍, ദമന്‍ എന്നിവ കല്‍പ്പനയുടെ ചിത്രങ്ങളാണ്. പ്രശസ്ത ഗായകന്‍ ഭൂപന്‍ ഹസാരികയെയാണ് കല്‍പ്പന ജീവിത പങ്കാളിയായി സ്വീകരിച്ചത്