സലിം കുമാർ അമ്മ അംഗത്വം രാജിവെച്ചു

ഗണേശിന് വേണ്ടി ​മോഹൻലാൽ പ്രചരണത്തിന് പത്തനാപുരത്ത് പോയതിൽ പ്രതിഷേധിച്ച് നടൻ സലിംകുമാർ അമ്മയിലെ അംഗത്വം രാജിവെച്ചു. അമ്മയിലെ അംഗങ്ങൾ പരസ്പരം മത്സരിക്കുന്ന ഘട്ടം വന്നാൽ താരങ്ങൾ ആരുടെയും പക്ഷം പിടിക്കരുതെന്ന് അമ്മയിൽ ഒരു അലിഖിത നിയമമുണ്ടെന്നും ലാൽ ഈ നിയമം ലംഘിച്ചെന്നും സലിംകുമാർ പ്രതികരിച്ചു. അമ്മയുടെ ഭാരവാഹിയായ മോഹൻലാൽ വോട്ടുപിടിക്കാൻ പോയത് ശരിയായില്ല. ഗണേശും ജഗദീഷും ഭീമൻ രഘുവും മത്സരിക്കുന്നിടത്ത് താൻ വോട്ടുപിടിക്കാൻ പോകാതിരുന്നത് ഈ നിയമം കൊണ്ടാണെന്നും സലിംകുമാർ പറഞ്ഞു.

എന്നാൽ രാജി സലിംകുമാറിന്‍റെ വേദനയുടെ ഫലമാണെന്ന് ജഗദീഷ് പ്രതികരിച്ചു. ലാൽ ഗണേശിന് വേണ്ടി വോട്ടുപിടിക്കാൻ പോയതോടെ അമ്മയിലെ ബഹു ഭൂരിപക്ഷം അംഗങ്ങൾക്കും മുറിവേറ്റു. ഏതെങ്കിലും രാഷ്ട്രീയ പാർട്ടിയിൽ അംഗമായവർക്ക് തെരഞ്ഞെടുപ്പ് പ്രചരണത്തിന് പോകാം. എന്നാൽ ഒരു പാർട്ടിയിലും അംഗമല്ലാത്ത ലാൽ ഗണേശിനു വേണ്ടി വോട്ടുപിടിക്കാൻ പോയതിൽ വേദനയുണ്ട്.

ലാലും പ്രിയദർശനും തനിക്ക് ധാർമിക പിന്തുണ തന്നതാണ്. പിന്നീട് എന്താണ് സംഭവിച്ചതെന്ന് അറിയില്ല. ലാൽ ആരെയെങ്കിലും പേടിച്ച് വന്നതാണെന്ന് കരുതുന്നില്ല. സലിംകുമാർ കാട്ടിയ മാതൃക പിൻതുടരുമോ എന്ന ചോദ്യത്തിന് മറ്റ് അംഗങ്ങളുമായി ആലോചിച്ച് ചെയ്യുമെന്നും ജഗദീഷ് പ്രതികരിച്ചു.