ലക്ഷ്മി റായിയുടെ ഗ്ലാമർ ചിത്രവുമായി പഹ്‍ലജ് നിഹലാനി

മുംബൈ: മുന്‍ സെന്‍സര്‍ബോര്‍ഡ് ചെയര്‍മാന്‍ പഹ്‌ലജ് നിഹലാനി ചലച്ചിത്ര വിതരണ രംഗത്തിറങ്ങുന്നു. സെന്‍സര്‍ ബോര്‍ഡ് അധ്യക്ഷനായിരിക്കെ അശ്ലീല രംഗങ്ങളെന്നും സംഭാഷണങ്ങളെന്നും ചൂണ്ടിക്കാട്ടി നിരവധി ചിത്രങ്ങളില്‍ കത്രിക വെച്ച പഹ്‌ലജ് വിതരണം ചെയ്യുന്ന ആദ്യചിത്രം ഇറോട്ടിക് വിഭാഗത്തില്‍ നിന്നാണെന്നതാണ് സവിശേഷത. സിനിമകളിലെ രംഗങ്ങളുടെ പേരില്‍ വിവാദമുണ്ടാക്കിയ നിഹലാനി ‘ഉഡ്ത പഞ്ചാബ്’ എന്ന് ചിത്രത്തിന് 89 കട്ടുകളായിരുന്നു നിര്‍ദ്ദേശിച്ചിരുന്നത്. പീന്നിട് ചിത്രത്തിന്റെ അണിയറപ്രവര്‍ത്തകര്‍ കോടതിയെ സമീപിച്ചാണ് ചിത്രം തിയറ്ററുകളില്‍ എത്തിച്ചിരുന്നത്. അശ്ലീല സംഭാഷണങ്ങള്‍ നിറഞ്ഞ സ്ത്രീ കേന്ദ്രീകൃത സിനിമയാണ് എന്ന് ചൂണ്ടിക്കാണിച്ചുകൊണ്ട് അലംകൃത ശ്രീവാസ്തയുടെ ‘ലിപ്സ്റ്റിക് അണ്ടര്‍ മൈ ബുര്‍ഖ’ എന്ന ചിത്രത്തിന് സര്‍ട്ടിഫിക്കറ്റ് നല്‍കാന്‍ വിസമ്മതിച്ച സെന്‍സര്‍ ബോര്‍ഡ് നടപടിയും ഏറെ വിവാദങ്ങള്‍ക്ക് വഴിവെച്ചിരുന്നതാണ്.

സെന്‍സര്‍ ബോര്‍ഡിലിരിക്കെ ചലച്ചിത്രത്തിന് ആവശ്യമായ രംഗങ്ങള്‍പ്പോലും ഒഴിവാക്കാന്‍ ആവശ്യപ്പെട്ട് വിവാദത്തില്‍ അകപ്പെട്ട വ്യക്തിയാണ് ഇറോട്ടിക് ചിത്രം ജനങ്ങളിലേക്കെത്തിക്കുന്നതെന്നാണ് ഏറെ രസാവഹം. അധികാരത്തിലെത്തിയത് മുതല്‍ വിവാദങ്ങള്‍ക്കൊപ്പം സഞ്ചരിച്ച നിഹലാനിയെ കഴിഞ്ഞ മാസമാണ് സര്‍ക്കാര്‍ സ്ഥാനത്ത് നിന്ന് നീക്കിയിരുന്നത്. ഇതിനു പിന്നാലെയാണ് നിഹലാനി വിതരണ രംഗത്തിറങ്ങിയത്. സെന്‍സര്‍ ബോര്‍ഡിലിരിക്കെ ‘സദാചാര’ത്തിന്റെ വക്താവായിരുന്നു നിഹലാനിയുടെ പുതിയ രൂപമാറ്റമാണ് ഏവരെയും ഞെട്ടിച്ചിരിക്കുന്നത്. ‘സദാചാര’വാദവുമായി നിരവധി മികച്ച ചിത്രങ്ങള്‍ക്ക് തടസവാദം ഉന്നയിച്ച വ്യക്തി ഇറോട്ടിക് ത്രില്ലര്‍ വിഭാഗത്തില്‍ പെടുന്ന ‘ജൂലി 2’ എന്ന സിനിമയാണ് തിയേറ്ററുകളിലെത്തിക്കുന്നത്.
റായ് ലക്ഷ്മി നായികയായെത്തുന്ന ചിത്രമാണ് ‘ജൂലി 2’. അതീവ ഗ്ലാമറസായി റായ് ലക്ഷ്മി എത്തുന്ന ചിത്രത്തിന്റെ ട്രെയിലര്‍ പുറത്തിറങ്ങിയിട്ടുണ്ട്.


താരത്തിന്റെ കരിയറിലെ ഏറ്റവും ഗ്ലാമര്‍ പ്രകടനമാവും ദീപക് ശിവ്ദാസ് സംവിധാനം ചെയ്യുന്ന ജൂലി 2. നേഹ ദൂപിയ നായികയായി എത്തിയ ജൂലിയുടെ രണ്ടാം ഭാഗമാണ് ജൂലി 2 എന്ന ചിത്രം. ചിത്രത്തിന്റെ വിതരണം നിഹലാനി തന്നെയാണെന്ന് സംവിധായകന്‍ ദീപക് ശിവ്ദാസ് സ്ഥിരീകരിച്ചിട്ടുണ്ട്. സിനിമ പൂര്‍ത്തിയായ ശേഷം അദ്ദേഹവും ഭാര്യയും സിനിമ കണ്ടെന്നും ഈ സിനിമ ഇപ്പോള്‍ എന്റേതാണ് ഇത് ഞാന്‍ വിതരണം ചെയ്യുമെന്നുമാണ് അദ്ദേഹം പറഞ്ഞതായും ശിവ്ദാസ് വ്യക്തമാക്കി.

Scissorhands Pahlaj Nihalani returns with 'Julie 2'

Scissorhands Pahlaj Nihalani returns to Bollywood with 'Julie 2'.