ഷംനയ്ക്ക് പുറമെ മറ്റൊരു നടിയും തട്ടിപ്പിനിരയായി; പ്രതികള്‍ക്കെതിരെ കൂടുതൽ പേർ

ഷംനയ്ക്ക് പിന്നാലെ ഇപ്പോള്‍ മൂന്ന് പെൺകുട്ടികൾ പരാതിയുമായി മരട് പോലീസിനെ സമീപിച്ചിട്ടുണ്ട്. പരസ്യചിത്രത്തിൽ അഭിനയിപ്പിക്കാമെന്ന് വാഗ്ദാനം ചെയ്താണ് ഇവർ മോഡലുകളായ പെൺകുട്ടികളിൽ നിന്ന് പണം തട്ടിയിരിക്കുന്നത്. ഇവരിലൊരാള്‍ സിനിമകളിൽ ചെറിയ വേഷങ്ങളിൽ അഭിനയിച്ചിട്ടുള്ള നടിയുമാണ്.

ടിക് ടോക് താരത്തിന്‍റെ വിവാഹ ആലോചനയുമായാണ് ഈ സംഘം ഷംന കാസിമിൻ്റെ വീട്ടിൽ എത്തിയിരുന്നത്. പരിചയം സ്ഥാപിച്ചശേഷം ഷംനയുടെ വീടും പരിസരവും ഇവര്‍ വീഡിയോയിൽ പകർത്തുകയായിരുന്നു. തുടർന്ന് നടിയുമായി സൗഹൃദം സ്ഥാപിക്കാനുള്ള ശ്രമങ്ങളായിരുന്നു. പല പ്രാവശ്യം വിളിച്ച് ഒടുവിൽ ഒരു ലക്ഷം ആവശ്യപ്പെടുകയായിരുന്നു. ടിക് ടോക് താരമായ അൻവർ അലി എന്ന പേര് പറഞ്ഞാണ് വരൻ എന്നു പറഞ്ഞ് പരിചയപ്പെടുത്തിയത്.

Also Read: ഭീഷണിപ്പെടുത്തി പണം തട്ടാൻ ശ്രമം: നടി ഷംന കാസിമിൻ്റെ പരാതിയിൽ നാലു പേർ അറസ്റ്റിൽ

ആവശ്യപ്പെട്ട തുക തന്നില്ലെങ്കിൽ കരിയർ നശിപ്പിക്കുമെന്നുള്‍പ്പെടെ ഭീഷണിപ്പെടുത്തിയെന്ന് ഷംന പോലീസിൽ നൽകിയ പരാതിയിൽ പറഞ്ഞിട്ടുണ്ട്. നടിയുടെ അമ്മയാണ് കൊച്ചി സിറ്റി പോലീസ് കമ്മീഷണർക്ക് പരാതി നൽകിയത്. ഷാഡോ പോലീസ് നടത്തിയ അന്വേഷണത്തിലാണ് പ്രതികളെ പിടികൂടിയിരിക്കുന്നത്. ഇവര്‍ക്ക് സ്വര്‍ണ്ണക്കടത്ത് സംഘവുമായി ബന്ധമുള്ളവരാണെന്ന സൂചനയുംപോലീസിന് ലഭിച്ചിട്ടുണ്ട്.

ഷംനയുടെ വീട്ടുകാരിൽ നിന്ന് 10 ലക്ഷം രൂപ തട്ടിയെടുക്കാനായിരുന്നു ഇവര്‍ പദ്ധതിയിട്ടിരുന്നതെന്നും പോലീസ് പറഞ്ഞിട്ടുണ്ട്. നാല് പേരാണ് ഇപ്പോള്‍ സംഭവത്തില്‍ അറസ്റ്റിലായിരിക്കുന്നത്. വാടാനപ്പള്ളി സ്വദേശി റഫീഖ്, കടവന്നൂര്‍ രമേശ്, കൈപ്പമംഗലം സ്വദേശി ശരത്, ചേറ്റൂര്‍ സ്വദേശി അഷ്‌റഫ് എന്നിവരാണ് പോലീസിന്‍റെ പിടിയിലായിരിക്കുന്നത്, ഇവരെ റിമാൻഡ് ചെയ്തിരിക്കുകയാണ്. ഇവരുടെ തട്ടിപ്പിനിരയായവര്‍ നിരവധിപേരുണ്ടെന്നും ഇവരും പരാതിയുമായി വരാൻ സാധ്യതയുണ്ടെന്നുമാണ് പോലീസ് പറയുന്നത്.

Also Read: വീട്ടിൽ വിവാഹാലോചനയുമായി എത്തിയവരാണ് ഇതിന് പിന്നിൽ; സംഭവത്തെ കുറിച്ച് ഷംന