`നവല്‍ എന്ന ജുവല്‍' ആംസ്റ്റര്‍ഡാം മേളയില്‍ പ്രദര്‍ശിപ്പിക്കും

ശ്വേത മേനോൻ മുഖ്യ വേഷത്തെ അവതരിപ്പിച്ച `നവല്‍ ദി ജുവല്‍' ആംസ്റ്റര്‍ ഡാം അന്താരാഷ്ട്ര ചലച്ചിത്ര മേളയില്‍ പ്രദര്‍ശിപ്പിക്കും. രഞ്ജിലാല്‍ ദാമോദരനാണ് ചിത്രം സംവിധാനം ചെയ്തത്. ആഗസ്റ്റ് 11 മുതല്‍ 18 വരെ നടക്കുന്ന ചലച്ചിത്രമേളയില്‍ മത്സര വിഭാഗത്തിലാണ് `നവല്‍ ദി ജുവല്‍' പ്രദര്‍ശിപ്പിക്കുക. ഹോളിവുഡ് നടി റിം കദിമും ചിത്രത്തിലെ പ്രധാന കഥാപാത്രത്തെ അവതരിപ്പിച്ചിരിക്കുന്നു. ഒരു അമ്മയും മകളും കടന്നുപോകുന്ന ജീവിത സംഘര്‍ഷങ്ങളും സമകാലിക ലോക രാഷ്ട്രീയവുമെല്ലാമാണ് ചിത്രത്തിന്‍റെ പ്രതിപാദ്യം. കേരളത്തിന്‍റെയും ഇറാന്‍റെയും സാംസ്‌കാരിക പശ്ചാത്തലത്തിലൂടെയാണ് ചിത്രത്തിന്‍റെ കഥ വികസിക്കുന്നത്.

ഓസ്‌കര്‍ അവാര്‍ഡ് ജേതാവ് അദില്‍ ഹുസൈന്‍, അനു സിത്താര, സുധീര്‍ കരമന തുടങ്ങിയവരാണ് ചിത്രത്തിലെ മറ്റു താരങ്ങള്‍. ഇന്‍ഡസ് വാലി ഫിലിം ക്രിയേഷന്‍സിന്‍റെ ബാനറില്‍ രഞ്ജി ലാല്‍, സിറിയക് മാത്യു ആലഞ്ചേരില്‍ എന്നിവര്‍ ചേര്‍ന്നാണ് ചിത്രം നിര്‍മ്മിച്ചത്. രഞ്ജിത്ത് ദാമോദരന്‍, വി.കെ അജിത് എന്നിവരാണ് ചിത്രത്തിന്‍റെ രചന നിര്‍വഹിച്ചത്. ഹോളിവുഡ് സംഗീതജ്ഞനായ എഡി ടോറസാണ് പശ്ചാത്തല സംഗീതം ഒരുക്കിയിരിക്കുന്നത്. ഒമാനില്‍ അതീവ സുരക്ഷയിലായിരുന്നു ചിത്രീകരണം.