ശ്യാമ പ്രസാദ് ചിത്രം 'ഹേയ് ജൂഡ്': ഫസ്റ്റ് ലുക്ക് പോസ്റ്റര്‍

ശ്യാമ പ്രസാദ് ചിത്രം 'ഹേയ് ജൂഡി'ന്‍റെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു. ചിത്രത്തിലെ മുഖ്യ കഥാപാത്രങ്ങളെ അവതരിപ്പിക്കുന്ന നിവിൻ പോളിയും തൃഷയും സ്കൂട്ടറിൽ പോകുന്ന ചിത്രമാണ് പോസ്റ്ററിലുള്ളത്. ‘ഇവിടെ’ എന്ന പൃഥ്വിരാജ് നിവിന്‍ പോളി ചിത്രത്തിന് ശേഷം ശ്യാമപ്രസാദ് സംവിധാനം ചെയ്യുന്ന ചിത്രം കൂടിയാണ് ‘ഹേയ് ജൂഡ്’.

ഇത് മൂന്നാം തവണയാണ് നിവിന്‍ പോളി ശ്യാമപ്രസാദ് ചിത്രത്തിന്‍റെ ഭാഗമാകുന്നത്. ആദ്യ ചിത്രം ‘ഇംഗ്ലീഷി’ലും ’ഇവിടെ’യിലും നിവിന്‍ ഭാഗമായിരുന്നു. പുതിയ ചിത്രമായ ഹേയ് ജൂഡില്‍ നിവിൻ തികച്ചും വേറിട്ട കഥാപാത്രത്തെയാണ് അവതരിപ്പിക്കുന്നത്. നിവിന്‍റെ നായികയായി തെന്നിന്ത്യയുടെ പ്രിയങ്കരിയായ നായിക തൃഷ മലയാളത്തിലേക്ക് ചുവട് വെയ്ക്കുകയാണ്. തൃൽ ചിത്രത്തിൽ ക്രിസ്റ്റല്‍ എന്ന കഥാപാത്രത്തെയാണ് അവതരിപ്പുക്കുന്നത്. ബീറ്റില്‍സിന്‍റെ വിഖ്യാതമായ ‘ഹേയ് ജൂഡ്’ എന്ന ഗാനത്തില്‍ നിന്നുമാണ് സിനിമയ്ക്കായി ശീര്‍ഷകം കിട്ടിയതെന്നും ആ ഗാനം തന്‍റെ പ്രിയപ്പെട്ടതാണെന്നും സംവിധായകന്‍ ശ്യാമപ്രസാദ് വ്യക്തമാക്കി.

ഗോവയിലും പരിസരപ്രദേശങ്ങളിലുമായാണ് ചിത്രത്തിന്‍റെ ഷൂട്ടിങ് പുരോഗമിക്കുന്നത്. സിദ്ദീഖ്, പ്രതാപ് പോത്തന്‍, നീനാ കുറുപ്പ് എന്നിവരും ചിത്രത്തിലുണ്ട്. അമ്പലക്കര ഗ്ലോബല്‍ ഫിലിംസിന്‍റെ ബാനറില്‍ അനില്‍ അമ്പലക്കരയാണ് ചിത്രം നിര്‍മ്മിക്കുന്നത്.