'അയ്യോ മീ ടുവോ? എന്‍റെ ദൈവമേ..! എന്ന് സിദ്ദിഖ്

നടൻ സിദ്ദിഖിനെതിരെ ഇന്നലെ വൈകീട്ട് രേവതി സമ്പത് എന്ന നടി നടത്തിയ മീ ടൂ ആരോപണത്തിനെതിരെ പ്രതികരിച്ച് താരം. ഈ ആരോപണത്തോട് ഇത് വരെ പ്രതികരിക്കാതിരുന്ന സിദ്ദിഖ് ഇന്ന് വൈകീട്ട് തന്‍റെ ഫേസ്ബുക്ക് പേജിൽ ഇതിന് മറുപടിയെന്നോണമാണ് ഒരു വീഡിയോ പോസ്റ്റ് ചെയ്തിരിക്കുന്നത്.


ദിലീപ് ചിത്രം കോടതിസമക്ഷം ബാലൻ വക്കീലിലെ ഒരു ഡിലീറ്റഡ് സീനാണ് അദ്ദേഹം ഷെയർ ചെയ്‌തിരിക്കുന്നത്‌. മീ ടൂവിനെ കളിയാക്കി കൊണ്ടുള്ള ഒരു സീനാണത്. ഇത് ഇതിനുമുമ്പും അദ്ദേഹം പങ്കുവെച്ചിരുന്നതാണ്. എന്നാൽ ഇപ്പോള്‍ ഈ സാഹചര്യത്തിൽ ഇത് പങ്കുവെച്ചിരിക്കുന്നത് മനപ്പൂര്‍വ്വം തന്നെയെന്നാണ് പലരും ഈ വീഡിയോയ്ക്ക് താഴെ കമന്‍റ് ചെയ്തിരിക്കുന്നത്.

ചിത്രത്തിൽ ദിലീപിന്‍റെ അച്ഛനായി അഭിനയിക്കുന്ന സോമശേഖരൻ പിള്ള എന്ന കഥാപാത്രത്തിന്‍റെ വീ‍ഡിയോയാണ് സിദ്ദിഖ് പങ്കുവെച്ചിരിക്കുന്നത്. ആ കഥാപാത്രത്തെ അവതരിപ്പിച്ചിരിക്കുന്നതും സിദ്ദിഖ് തന്നെയാണ്.