ശ്രീകാന്ത് വെട്ടിയാർ സിനിമയിലേക്ക്; ആദ്യ ചിത്രം 'തണ്ണീ‍ർമത്തൻ' ടീമിന്‍റെ 'സൂപ്പര്‍ ശരണ്യ'

സംവിധായകൻ ഗിരീഷ് എ.ഡി ഹിറ്റായ 'തണ്ണീര്‍മത്തൻ ദിനങ്ങൾ' എന്ന സിനിമയ്ക്ക് ശേഷം ഒരുക്കുന്ന 'സൂപ്പര്‍ ശരണ്യ' എന്ന സിനിമയുടെ ഭാഗമായിരിക്കുകയാണ് ശ്രീകാന്ത്. ശ്രീകാന്ത് തന്നെയാണ് സോഷ്യൽമീഡിയയിലൂടെ ഇത് അറിയിച്ചിരിക്കുന്നത്. ആദ്യ സിനിമ 'സൂപ്പര്‍ ശരണ്യ', ഗിരീഷ് എ.ഡിക്ക് നന്ദി എന്ന് കുറിച്ചുകൊണ്ട് സിനിമയുടെ അണിയറപ്രവർത്തകരോടൊപ്പം നിൽക്കുന്ന ചിത്രമാണ് ശ്രീകാന്ത് ഫേസ്ബുക്കിൽ പങ്കുവെച്ചിരിക്കുന്നത്.

ലോക്ക് ഡൗൺ കാലത്താണ് സോഷ്യൽമീഡിയയിൽ ചളു വീഡിയോകളുമായി ശ്രീകാന്ത് സജീവമായി തുടങ്ങിയത്. മായാവി, കാണിപ്പയ്യൂർ കോമഡി, ബോബി ചമ്മണ്ണൂർ ചലഞ്ച്, കപ്പേളലു, രാമൻ സ്കൂളിൽ ചേർത്ത കുട്ടി, സുദീപ് വാര്യർ ഉലത്തിയത്, സുമേഷ് പണിക്കർ, സീന കണ്ണൻ അഭിമുഖം, സുനി ടോം അഭിമുഖം, എസ്.ജി.എഫ് ചാപ്റ്റർ, ജോലി ഇല്ലാത്തവരുടെ പേഴ്സ്, സുനിത മാസിക അഭിമുഖം, ബേബി ചെങ്കല്ലൂർ, കാലൻ അൺബോക്സിങ്, ഡിജെ സുമേഷ് വെട്ടിയാർ, മുള്ളൻ കൊല്ലി വേലായുധൻ, ലൈഫ് ഓഫ് എ സ്കൂട്ടർ തുടങ്ങി രസകരമായ നിരവധി ചളു വീഡിയോകൾ ശ്രീകാന്ത് ഒരുക്കിയിട്ടുണ്ട്.

Also Read: '18 വർഷമായി അദ്ദേഹത്തെ പാടാൻ വിളിക്കുന്നുണ്ടെങ്കിൽ കഴിവുള്ളത് കൊണ്ട് തന്നെയാണ്'; വിനീത് ശ്രീനിവാസനെ വിമർശിച്ചവർക്ക് കൈലാസ് മേനോൻ്റെ മറുപടി!

ശ്രീകാന്ത് ആദ്യമായി അഭിനയിക്കുന്ന സിനിമയിൽ അനശ്വര രാജനാണ് കേന്ദ്ര കഥാപാത്രത്തെ അവതരിപ്പിക്കുന്നത്. ഒപ്പം അർജ്ജുൻ അശോകനുമുണ്ട്. പേരു സൂചിപ്പിക്കുന്നത് പോലെ സ്ത്രീ കേന്ദീകൃത കഥയാണ് ചിത്രം പറയുന്നതെന്നാണ് സൂചന. വളരെ ബോൾഡ് ലുക്കിലാണ് അനശ്വര പോസ്റ്ററിലുള്ളത്.

ചിത്രത്തിൻ്റെ രചനയും സംവിധാനവും സഹനിർമ്മാണവും ഗിരീഷ് തന്നെയാണ് നിർവഹിച്ചിരിക്കുന്നത് എന്നതാണ് മറ്റൊരു പ്രത്യേകത.ഷെബിൻ ബക്കർ പ്രൊഡക്ഷൻസിൻ്റെ ബാനറിൽ ഷെബിൻ ബെക്കറും ഗിരീഷ് എഡിയും ചേർന്നാണ് ചിത്രം നിർമ്മിക്കുന്നത്.സജിത്ത് പുരുഷനാണ് ചിത്രത്തിൻ്റെ ഛായാഗ്രഹണം നിർവ്വഹിക്കുന്നത്. ആകാശ് ജോസഫ് വർഗ്ഗീസാണ് ചിത്ര സംയോജനം. ജസ്റ്റിൻ വർഗ്ഗീസ് ഗാനങ്ങൾക്ക് ഈണം പകരുന്നു. സുഹൈൽ കോയ ആണ് ഗാനരചന നിർ‍വ്വഹിക്കുന്നത്.