വിനായകന്‍റെ 'ഗംഗ' പിന്നിലാക്കിയ മൂന്ന് വേഷങ്ങള്‍

സംസ്ഥാന ചലച്ചിത്ര അവാർഡിന് 'കമ്മട്ടിപാട'ത്തിലൂടെ വിനായകൻ അർഹനായിരിക്കുകയാണ്. ഒഡിഷ സംവിധായകനും ക്യാമറാമാനുമായ എ.കെ.ബീര്‍ ചെയര്‍മാനായ ജൂറിയ്ക്ക് എല്ലായിടത്തുനിന്നും അഭിനന്ദനങ്ങളാണ്. ഇതുവരെയുള്ള സംസ്ഥാന ചലച്ചിത്ര അവാ‍ർഡ് പ്രഖ്യാപനമല്ല എല്ലാം അർഹതപ്പെട്ടവർക്ക് തന്നെയെന്നാണ് സിനിമാപ്രേമികൾ പറയുന്നത്. എന്നാൽ മറ്റ് നടന്മാരുമായി കടുത്ത മത്സരത്തിന് ശേഷമാണ് വിനായകൻ മികച്ച നടനായതെന്ന് ജൂറി അംഗങ്ങൾ അഭിപ്രായപ്പെടുന്നു.



മാന്‍ ഹോള്‍, മഹേഷിന്‍റെ പ്രതികാരം, കാടു പൂക്കുന്ന നേരം, അയാള്‍ ശശി, കറുത്ത ജൂതന്‍, കമ്മട്ടിപ്പാടം, മുന്തിരി വള്ളികള്‍ തളിര്‍ക്കുമ്പോള്‍, ഗപ്പി, ഒപ്പം, കിസ്‍‍മത്ത്, ഒരു മുത്തശ്ശി ഗദ, ജോമോന്‍റെ സുവിശേഷങ്ങള്‍, പുലി മുരുകന്‍ എന്നീ ചിത്രങ്ങളാണ് അവസാന റൗണ്ടിലെത്തിയിരുന്നത്. ഇതിൽ ഒപ്പം, മുന്തിരിവള്ളികൾ, പുലിമുരുകൻ എന്നീ മൂന്ന് ചിത്രങ്ങളുമായി മോഹന്‍ലാലും മഹേഷിന്‍റെ പ്രതികാരത്തിലൂടെ ഫഹദ് ഫാസിലും അയാൾ ശശി, ഗപ്പി എന്നീ ചിത്രങ്ങളിലൂടെ ശ്രീനിവാസനും കമ്മട്ടിപാടത്തിലെ തന്നെ ബാലൻ ചേട്ടൻ എന്ന കഥാപാത്രം അവതരിപ്പിച്ച മണികണ്ഠൻ ആചാരിയും വിനായകന് കടുത്ത വെല്ലുവിളിയായിരുന്നു. ഇതെല്ലാം അതിജീവിച്ചാണ് 'കമ്മട്ടിപാട'ത്തിലെ 'ഗംഗ' വിജയകിരീടം ചൂടിയത്.

Kerala state film awards 2016.