'സ്വാതന്ത്ര്യം അര്‍ദ്ധരാത്രിയില്‍' നാളെ തീയേറ്ററുകളിൽ

അങ്കമാലി ഡയറീസ് ഫെയിം ആന്‍റണി വർഗീസ് നായകനാകുന്ന ‘സ്വാതന്ത്ര്യം അര്‍ദ്ധരാത്രിയില്‍’ നാളെ തീയേറ്ററുകളിലെത്തും. ആക്ഷന്‍ ത്രില്ലര്‍ ഗണത്തില്‍പ്പെടുന്ന സിനിമയുടെ പോസ്റ്ററും ട്രെയിലറും സാമൂഹ മാധ്യമങ്ങളിൽ വൻ തരംഗമായിരുന്നു. ലിജോ ജോസ് പെല്ലിശ്ശേരിയുടെ അസ്സോസ്സിയേറ്റ് ആയിരുന്ന ടിനു പാപ്പച്ചനാണ് ചിത്രം സംവിധാനം ചെയ്യുന്നത്. ടിനു പാപ്പച്ചന്‍ അങ്കമാലി ഡയറീസിന്‍റെ ചീഫ് അസോസിയേറ്റായി പ്രവര്‍ത്തിച്ചിരുന്നു . ദിലീപ് കുര്യനാണ് ചിത്രത്തിന് തിരക്കഥയൊരുക്കിയിരിക്കുന്നത്.

ഫിനാന്‍സ് കമ്പനി മാനേജരായ കോട്ടയംകാരനായാണ് ആന്‍റണി ചിത്രത്തിൽ പ്രത്യക്ഷപ്പെടുക. ഒരു രാത്രിയിലെ സംഭവം ജീവിതം മാറ്റി മറിക്കുന്നതും ആ പ്രശ്‌നം പരിഹരിക്കാന്‍ നടത്തുന്ന ശ്രമങ്ങളുമാണ് ചിത്രത്തിന്‍റെ ഇതിവൃത്തം. അങ്കമാലി ഡയറീസിലെ വില്ലന്‍ കഥാപാത്രമായ യു ക്ലാംപ് രാജനെ അവതരിപ്പിച്ച ടിറ്റൊ വില്‍സണും വിനായകനും ചെമ്പൻ വിനോദും ചിത്രത്തിൽ പ്രധാനവേഷങ്ങൾ അവതരിപ്പിക്കുന്നുണ്ട്. ബി ഉണ്ണികൃഷ്ണന്‍ ആദ്യമായി നിര്‍മിച്ച് അവതരിപ്പിക്കുന്ന ചിത്രം കൂടിയാണിത്. ബി.സി ജോഷിയും ലിജോ ജോസ് പല്ലിശ്ശേരിയും ചെമ്പന്‍ വിനോദ് ജോസും നിര്‍മ്മാണത്തിൽ പങ്കാളികളാണ്.