സംഗീത പ്രേമികളുടെ മനസ് കവര്‍ന്ന് 'ഇങ്കേം ഇങ്കേം ഇങ്കേം കാവലേ'

അടുത്തിടെ മലയാളികളുടെ മനം കവര്‍ന്ന അന്യഭാഷാ ഗാനം ഏതെന്ന ചോദ്യത്തിന് ഒറ്റ ഉത്തരമേ കിട്ടുകയുള്ളൂ. തെലുങ്ക് ചിത്രമായ ഗീതാ ഗോവിന്ദത്തിലെ 'ഇങ്കേം ഇങ്കേം ഇങ്കേം കാവലേ' എന്ന തുടങ്ങുന്ന മനോഹരമായ ഗാനം. ഈ ഗാനത്തിന്‍റെ പിന്നണണിയിലുള്ള മലയാളി ടച്ച് ആവാം ഒരു പക്ഷേ ഇതിന് കാരണം. മലയാളികളുടെ പ്രിയപ്പെട്ട സംഗീത സംവിധായകൻ ഗോപി സുന്ദറാണ് ഈ ഗാനത്തിന് സംഗീതം നിര്‍വ്വഹിച്ചിരിക്കുന്നത്. ആലപിച്ചിരിക്കുന്നത് ദിവ്യ എസ് മേനോനും ഗോപി സുന്ദറും അജയ് സത്യനും ചേര്‍ന്നാണ്. ഗാനത്തിന് യൂട്യൂബിൽ ഏറെയും മലയാളി ആരാധകരാണ് കമൻ്റ് ഇട്ടിരിക്കുന്നത്.

അടുത്തിടെയായി വാട്ട്സാപ്പ് സ്റ്റാറ്റസുകളിലും മറ്റു സോഷ്യൽ മീഡിയകളിലും നിറഞ്ഞു നിൽക്കുന്ന ഈ ഗാനരംഗങ്ങളിൽ അഭിനയിച്ചിരിക്കുന്നത് തെലുങ്ക് യുവതാരം വിജയ് ദേവരകൊണ്ടയാണ്. തെലുങ്കില്‍ കഴിഞ്ഞ വര്‍ഷം പുറത്തിറങ്ങിയ ഹിറ്റ് ചിത്രങ്ങളിലൊന്നായ അര്‍ജുന്‍ റെഡ്ഢിയിലെ നായകനാണ് വിജയ്. സന്ദീപ് റെഡ്ഢി ഒരുക്കിയ ഈ ചിത്രവും ഹിറ്റായിരുന്നു.തെന്നിന്ത്യന്‍ നടി സാവിത്രിയുടെ ജീവിത കഥ പറഞ്ഞ സൂപ്പ‍ര്‍ഹിറ്റ് ചിത്രം മഹാനടിയിലും വിജയ്‌ അന്തോണി എന്ന ഒരു പ്രധാന കഥാപാത്രത്തെ അവതരിപ്പിച്ചിട്ടുണ്ട്. ഗീതാഗോവിന്ദത്തിലെ മറ്റൊരു ഗാനം ആലപിച്ചിരിക്കുന്നതും വിജയ് ആണ്.



റിലീസിന് തയ്യാറെടുക്കുന്ന ഗീതാഗോവിന്ദത്തിന് സെൻസര്‍ ബോര്‍ഡ് യു/എ സര്‍ട്ടിഫിക്കറ്റ് നൽകിയതായി അറിയിച്ച് വിജയ് കഴിഞ്ഞദിവസം ട്വീറ്റ് ചെയ്തിരുന്നു. ചിത്രം ആഗസ്റ്റ് 15 സ്വാതന്ത്രദിനത്തില്‍ തിയറ്ററുകളിലെത്തും. G2A പിക്‌ചേഴ്‌സ് നിര്‍മ്മിക്കുന്ന ചിത്രം സംവിധാനം ചെയ്യുന്നത് പരശുറാം ആണ്. ചിത്രത്തിൻ്റെ ടീസറും ഗാനങ്ങളും ഇതിനോടകം തന്നെ വൈറലാണ്. റഷ്മിക മന്ദാനയാണ് നായിക.

ഗീത എന്ന പെണ്‍കുട്ടിയുമായി വിജയ് പ്രണയത്തിലാകുകയും അവളെ ഇംപ്രസ് ചെയ്യാനായി നടത്തുന്ന ശ്രമങ്ങളാണ് ചിത്രത്തിലെ പ്രമേയം. വെണ്ണല കിഷോര്‍, സുബ്ബരാജു, രാഹുല്‍ രാമകൃഷ്ണ, അന്നപൂര്‍ണ, നാഗേന്ദ്ര ബാബു, ഗിരി ബാബു എന്നിവരും ചിത്രത്തില്‍ അഭിനയിക്കുന്നുണ്ട്. മണികണ്ഠനാണ് ക്യാമറ കൈകാര്യം ചെയ്യുന്നത്.