'തണ്ണീർ മത്തനി'ലെ ജോയ്സൺ ഇനി നായകനും സംവിധായകനും

ഈയടുത്ത് തിയറ്ററുകളിലെത്തി വലിയ വിജയം നേടിയ 'തണ്ണീർ മത്തൻ ദിനങ്ങളു'ടെ വമ്പൻ വിജയത്തിന് ശേഷം പ്ലാൻ ജെ സിനിമാസ് വീണ്ടും. പ്ലാൻ ജെയുടെ അടുത്ത ചിത്രത്തിൽ ഡിനോയ് പൗലോസാണ് നായകനും സംവിധായകനും ആകുന്നത്. 'തണ്ണീർ മത്തനി'ൽ നായകനായിരുന്ന ജെയ്സന്‍റെ സഹോദരനായ ജോയ്സൺ എന്ന കഥാപാത്രത്തെയായിരുന്നു ഡിനോയ് അവതരിപ്പിച്ചിരുന്നത്. ചിത്രത്തിൽ ഡിനോയിയുടെ പ്രകടനം ഏറെ ശ്രദ്ധപിടിച്ചുപറ്റിയിരുന്നു.

Also Read: മണപ്പുറത്ത് മൊട്ടിട്ട 'തണ്ണീര്‍മത്തൻ' സൗഹൃദം

പ്ലാൻ ജെ സിനിമാസിന്‍റെ ബാനറിൽ ജോമോൻ ടി ജോൺ, ഷമീർ മുഹമ്മദ് എന്നിവർ ചേര്‍ന്ന് നിർമ്മിക്കുന്ന പുതിയ ചിത്രത്തിലാണ് ഡിനോയ് പൗലോസ് നായകനാകുന്നത്.

Also Read: തണ്ണീർ മത്തൻ ദിനങ്ങൾ സിനിമ റിവ്യൂ

ഇതിനകം തിയറ്ററുകളിൽ നിന്ന് 45 കോടിയിലേറെ കളക്ട് ചെയ്ത 'തണ്ണീർ മത്തൻ ദിനങ്ങളു'ടെ തിരക്കഥ ഒരുക്കുന്നതിലും പങ്കാളി ആയിരുന്നു ഡിനോയ്. ജോമോൻ ടി ജോൺ തന്നെ ക്യാമറ ഒരുക്കുന്ന ചിത്രത്തിന്‍റെ എഡിറ്റിങ് ഷമീർ മുഹമ്മദ് തന്നെയാണ് നിർവഹിക്കുന്നത്.

Also Read: 'തണ്ണീര്‍മത്തൻ' നൊസ്റ്റാള്‍ജിക് ഫീലിംഗ്; താരങ്ങളുടെ പ്രതികരണം

'തണ്ണീർ മത്തനി'ൽ 'ജാതിക്കാ തോട്ടം' എന്ന സൂപ്പർ ഹിറ്റ്‌ ഗാനമുള്‍പ്പെടെയുള്ള ഗാനങ്ങളൊരുക്കിയ ജസ്റ്റിൻ വര്‍ഗ്ഗീസ് തന്നെയാണ് പുതിയ ചിത്രത്തിലും സംഗീതം ഒരുക്കുന്നത്. വലിയ ക്യാൻവാസിൽ ഒരുക്കുന്ന ചിത്രത്തിൽ മലയാളത്തിലെ ഒരു പ്രമുഖ നടിയാണ് നായികാ കഥാപാത്രത്തെ അവതരിപ്പിക്കുന്നതെന്നും സൂചനയുണ്ട്. വൈപ്പിൻ എടവനക്കാട് സ്വദേശിയാണ് ഡിനോയ് പൗലോസ്. ഡിനോയിയും ഗിരീഷ് എ.ഡിയും ചേര്‍ന്ന് തിരക്കഥയൊരുക്കിയ തണ്ണീർമത്തൻ ദിനങ്ങള്‍ സംവിധാനം ചെയ്തിരുന്നത് ഗിരീഷ് എ.ഡി ആയിരുന്നു.