'തോപ്പില്‍ ജോപ്പൻ' ഒരിക്കലും കോട്ടയം കുഞ്ഞച്ചനല്ല...

മമ്മൂട്ടി നായകനായി എത്തിയ 'തോപ്പില്‍ ജോപ്പന്‍' തിയേറ്ററുകളിൽ ആവേശമാവുകയാണ്. മമ്മൂട്ടി വീണ്ടും കോട്ടയത്തുകാരന്‍ അച്ചായനായി എത്തുന്നു എന്ന് കേട്ടപ്പോള്‍ പലരുടെയും മനസ്സില്‍ തെളിഞ്ഞ മുഖം കോട്ടയം കുഞ്ഞച്ചന്റേതായിരിക്കും. മമ്മൂട്ടിയ്ക്ക് ഒരു ഹാസ്യ നായകന്‍ പരിവേഷം കൊടുത്ത ചിത്രമാണ് കോട്ടയം കുഞ്ഞച്ചന്‍. കോട്ടയം കുഞ്ഞച്ചന് ശേഷം പിന്നെയും ഒരുപട് അച്ചായന്‍ കഥാപാത്രങ്ങള്‍ മെഗാസ്റ്റാര്‍ അവതരിപ്പിച്ചുവെങ്കിലും അതിനൊന്നും കുഞ്ഞച്ചന്‍ സ്റ്റൈല്‍ ഉണ്ടായിരുന്നില്ല.

എന്നാല്‍ തോപ്പില്‍ ജോപ്പന് കോട്ടയം കുഞ്ഞച്ചന്റെ ചില സാമ്യതകളൊക്കെ ഒത്തുവന്നിട്ടുണ്ട്. മറ്റൊന്നുമല്ല കോട്ടയം കുഞ്ഞച്ചനെ പോലെ തോപ്പില്‍ ജോപ്പനും ഹാസ്യ നായക കഥാപാത്രമാണ്. എന്നാല്‍ കോട്ടയം കുഞ്ഞച്ചനുമായ തോപ്പില്‍ ജോപ്പനെ ഒരു തരത്തിലും സാമ്യപ്പെടുത്താന്‍ കഴിയില്ല എന്ന് സിനിമകണ്ടാലറിയാം. കഥയെഴുതിയ നിഷാദ് കോയ പറയുന്നത് രണ്ട് കഥാപാത്രങ്ങളും കോട്ടയത്തുകാരന്‍ അച്ചായനാണെന്നതൊഴിച്ചാല്‍ ഒരു സാമ്യവും ഇല്ലെന്നാണ്.

ഇടുക്കി ജില്ലയിലെ തൊപ്രാംകുടിയില്‍ തോട്ടമുടമസ്ഥനായ മധ്യവയസ്‌കനാണ് തോപ്പില്‍ ജോപ്പന്‍. അത്യാവശ്യം കബടിക്കമ്പമുണ്ട്. ഇടുക്കി സ്ലാങിലാണ് മമ്മൂട്ടി സംസാരിക്കുന്നത്. വളരെ യാഥാര്‍ത്ഥ്യമായി, യാതൊരു അമാനുഷികയതയും ഇല്ലാത്ത സാധാരണ കഥാപാത്രമാണ് തോപ്പില്‍ ജോപ്പന്‍ എന്ന് സംവിധായകൻ ജോണി ആന്‍റണിയും സമ്മതിക്കുന്നു.