ടൊവിനോ ചിത്രം 'എടക്കാട് ബറ്റാലിയൻ 06'ലെ ആദ്യ ഗാനത്തിൻ്റെ ടീസ‍ര്‍

ടൊവിനോ തോമസ് മുഖ്യ കഥാപാത്രമായി എത്തുന്ന എടക്കാട് ബറ്റാലിയൻ 06ൻ്റെ ആദ്യഗാനത്തിൻ്റെ ടീസര്‍ പുറത്ത് വിട്ടു. നീ ഹിമമഴയായ് എന്ന് തുടങ്ങുന്ന ഗാനത്തിൻ്റെ ടീസറാണ് ഇപ്പോൾ പുറത്ത് വിട്ടിരിക്കുന്നത്. നിത്യ മാമ്മനും ഹരിശങ്കര്‍ കെഎസും ചേര്‍ന്നാണ് ഗാനം ആലപിച്ചിരിക്കുന്നത്. ബികെ ഹരിനാരായണൻ്റെ വരികൾക്ക് കൈലാസ് മേനോൻ സംഗീതം പകര്‍ന്നിരിക്കുന്നു.

ചിത്രത്തിൻ്റെ ഫസ്റ്റ് ലുക്ക് പോസ്റ്റര്‍ കഴിഞ്ഞയാഴ്ച പുറത്ത് വിട്ടിരുന്നു. മോട്ടോർ ബൈക്കിനരികെ നിൽക്കുന്ന ടൊവിനോയുടെ ചിത്രമാണ് പോസ്റ്ററിലുള്ളത്. മലയാളത്തിൻ്റെ മെഗാസ്റ്റാർ മമ്മൂട്ടിയാണ് ഫസ്റ്റ്‍‍ലുക്ക് പോസ്റ്റർ ഫേസ്ബുക്ക് പേജിലൂടെ പുറത്തു വിട്ടത്. ചിത്രത്തിൽ പട്ടാളക്കാരനായാണ് ടൊവിനോ എത്തുന്നത്.

Also Read: തീക്കളി കളിക്കല്ലേ അച്ചായോ; ടൊവീനോയോട് ആരാധകര്‍

ഈ ചിത്രത്തിൻ്റെ ഷൂട്ടിങ്ങിനിടെ ടൊവിനോയ്ക്ക് പൊള്ളലേറ്റത് വലിയ വാർത്താ പ്രാധാന്യം നേടിയിരുന്നു. ചിത്രത്തിൽ അഗ്നിബാധയ്ക്കിടെ നടക്കുന്ന സംഘട്ടനരംഗം ചിത്രീകരിക്കുന്നതിനിടെയായിരുന്നു അപകടം നടന്നത്. ഡ്യൂപ്പിനെ ഉപയോഗിക്കുന്ന കാര്യം നവാഗത സംവിധായകനായ സ്വപ്നേഷ് കെ.നായര്‍ പറഞ്ഞെങ്കിലും ആവശ്യമില്ലെന്ന് പറഞ്ഞ് ടൊവീനോ തന്നെ അഭിനയിക്കുകയായിരുന്നു. പരിക്കേറ്റ ഉടൻ നടന് വൈദ്യസഹായം ലഭിച്ചതിനാൽ പരിക്ക് ഗുരുതരമായില്ല. പി ബാലചന്ദ്രൻ്റെ തിരക്കഥയിൽ നവാഗതനായ സ്വപ്നേഷ് കെ നായരാണ് എടക്കാട് ബറ്റാലിയൻ 06 സംവിധാനം ചെയ്യുന്നത്.

Also Read: 'തീവണ്ടി'യിലെ 'ജീവാംശമായ്' എന്ന ഗാനത്തിന് ശേഷം വീണ്ടുമൊന്നിച്ച് ഹിറ്റ് കൂട്ടുകെട്ട്

സംയുക്താ മേനോൻ ആണ് ചിത്രത്തിലെ നായികയായെത്തുന്നത്. സിനു സിദ്ധാർഥ് ആണ് ചിത്രത്തിൻ്റെ ഛായാഗ്രഹണം നിർവഹിക്കുന്നത്. റൂബി ഫിലിംസ് ആൻഡ് കാര്‍ണിവൽ മോഷൻ പിക്ചേഴ്സിന്‍റെ ബാനറിൽ ഡോ ശ്രീകാന്ത് ഭാസി, തോമസ് ജോസഫ് പട്ടത്താനം, ജയന്ത് മാമ്മൻ എന്നിവർ ചേർന്നാണ് ചിത്രം നിർമ്മിക്കുന്നത്. ഹരിനാരായണൻ എഴുതിയ വരികള്‍ക്ക് കൈലാസ് മേനോനാണ് സംഗീത സംവിധാനം നിർവഹിക്കുന്നത്.

Also Read: അന്ന് ഷൂട്ടിനിടെ സംഭവിച്ചതെന്ത്?: മനസുതുറന്ന് ടൊവിനോ

തീവണ്ടിക്ക് ശേഷം ടോവിനോ തോമസ്, സംയുക്ത മേനോന്‍ ഒന്നിക്കുന്ന പുതിയ ചിത്രമാണ് ഇത്. കമ്മട്ടിപ്പാടം എന്ന സൂപ്പര്‍ഹിറ്റ് ചിത്രത്തിന് ശേഷം പി.ബാലചന്ദ്രന്‍ തിരക്കഥ ഒരുക്കുന്ന ചിത്രം കൂടിയാണിത്. ലൂക്ക, കൽക്കി എന്നീ ചിത്രങ്ങളാണ് ടൊവീനോയുടേതായി അവസാനമായി തിയറ്ററുകളിലെത്തിയ ചിത്രങ്ങൾ. വൻ വിജയം നേടിയ ഈ ചിത്രങ്ങൾക്ക് ശേഷം ടൊവീനോ ചിത്രത്തിനായി കാത്തിരിക്കുകയാണ് ആരാധകര്‍.


Also Read: 'എടക്കാട് ബറ്റാലിയൻ 06'ൻ്റെ ഫസ്റ്റ്‍‍ലുക്ക് പോസ്റ്റർ

കിലോമീറ്റേഴ്സ് ആൻഡ് കിലോമീറ്റേഴ്സ്, മിന്നൽ മുരളി, ജോ, ആരവം, ഫോറെൻസിക്ക്, പള്ളിച്ചട്ടമ്പി, 563 സെന്‍റ്.ചാള്‍സ് സ്ട്രീറ്റ് തുടങ്ങിയവയാണ് താരത്തിന്‍റേതായി അണിയറയിൽ ഒരുങ്ങുന്ന പുതിയ ചിത്രങ്ങള്‍.