ഉദയ വീണ്ടും നി‍ർമാണരംഗത്ത്; ആദ്യചിത്രം കെപിഎസി

മലയാളത്തിലെ മുന്‍നിര ബാനറുകളിലൊന്നായ ഉദയാ സ്റ്റുഡിയോ വീണ്ടും നിർമാണരംഗത്തേക്ക്. കുഞ്ചാക്കോ ബോബനാണ് ഇത്തവണ ഉദയയ്ക്ക് ചുക്കാൻ പിടിക്കുന്നത്. സിദ്ധാര്‍ത്ഥ് ശിവ സംവിധാനം ചെയ്യുന്ന കൊച്ചൗവ്വ പൗലോ അയ്യപ്പ കൊയ്‌ലോ (കെപിഎസി)എന്ന ചിത്രത്തിലൂടെയാണ് ഇടവേളക്ക് ശേഷം ഉദയായുടെ ബാനർ മടങ്ങിയെത്തുന്നത്.

നെടുമുടി വേണു, മുകേഷ്, സുരാജ് വെഞ്ഞാറമ്മൂട്, അജു വര്‍ഗ്ഗീസ് മണിയന്‍ പിള്ള രാജു തുടങ്ങിയവരാണ് ചിത്രത്തിൽ പ്രധാന വേഷങ്ങളിൽ. സൂരജ് എസ് കുറുപ്പാണ് സംഗീതം, നീല്‍ ഡി കുഞ്ഞയാണ് ക്യാമറ. ഉദയായുടെ രണ്ടാമത്തെ ചിത്രം ബോബി സഞ്ജയ്‌യുടെ തിരക്കഥയില്‍ ലാല്‍ ജോസ് സംവിധാനം ചെയ്യും. കുഞ്ചാക്കോ ബോബനും ഈ ചിത്രത്തില്‍ പ്രധാന റോളിലുണ്ടാകും.

മലയാളത്തിലെ ഏറ്റവും പഴക്കമുള്ള സ്റ്റുഡിയോയാണ് ഉദയ. 1947ൽ തുടങ്ങിയ സ്റ്റുഡിയോ കൂവിത്തെളിയുന്ന കോഴിയുടെ ദൃശ്യം കൊണ്ട് മലയാളി മനസിൽ പതിഞ്ഞതാണ്. കുഞ്ചാക്കോയുടെ മുത്തച്ഛൻ കുഞ്ചാക്കോയും പിന്നീട് അച്ഛൻ ബോബൻ കുഞ്ചാക്കോയുമായിരുന്നു ഉദയയുടെ നടത്തിപ്പ്. 2004ൽ ബോബൻ കുഞ്ചാക്കോ അന്തരിച്ചതോടെയാണ് ഉദയ പ്രതിസന്ധിയിലായത്.