കാസര്‍കോട്ടെ നാട്ടുഭംഗിയും നിഗൂഢതയും തേടി ഒരു സിനിമ; 'വഴിയെ' ഹൊറര്‍ ചിത്രം ഒരുങ്ങുന്നു

കാസര്‍കോട്: സുരങ്കങ്ങള്‍ ഉള്‍പ്പെടെയുള്ള കാസര്‍കോട്ടെ നിഗൂഢ വഴികള്‍ ദൃശ്യവത്കരിച്ച് ഒരു സിനിമയൊരുങ്ങുന്നു. സിനിമയുടെ പിന്നണിയിലുള്ള മിക്കവരും കാസര്‍കോട് ജില്ലക്കാര്‍ എന്നതിലുപരി ഹോളിവുഡ് സംഗീതജ്ഞന്‍ ഇവാന്‍ ഇവാന്‍സ് ആദ്യമായി മലയാളസിനിമയ്ക്ക് സംഗീതമൊരുക്കുന്ന അപൂര്‍വ്വതയും ഈ സിനിമയ്ക്കുണ്ട്. വഴിയെ എന്നു പേരിട്ടിരിക്കുന്ന ഹൊറർ ചിത്രം കാസർകോട്ടെ കരിമ്പാറക്കെട്ടുകളും സുരങ്കങ്ങളും കല്ലുവെട്ടുകുഴികളുമൊക്കെ പകർത്തിയാണ് കഥ പറയുന്നത്.

സംസ്ഥാനത്തെ ഏറ്റവും കൂടുതല്‍ പുഴകളൊഴുകുന്ന ജില്ലയിലെ എല്ലാ നദികളും തന്നെ സിനിമയിലുണ്ടാകുമെന്നും ഒരു പരീക്ഷണ ചിത്രമായിരിക്കുമെന്നും സംവിധായകന്‍ നിര്‍മല്‍ ബേബി വര്‍ഗീസ് പറഞ്ഞു. അജ്ഞാതവും നിഗൂഢവുമായ ഒരുപ്രദേശത്തെക്കുറിച്ച് ഡോക്യുമെന്‍ററി ചിത്രം എടുക്കാനൊരുങ്ങുന്ന രണ്ടു യൂട്യൂബ് വ്ളോഗർമാരുടെ അനുഭവങ്ങളും അവര്‍ നേരിടുന്ന അപകടങ്ങളുമാണ് ചിത്രത്തിന്‍റെ ഇതിവൃത്തം.

Also Read: മലയാള സിനിമയിലേക്ക് ഹോളിവുഡ് സംഗീത സംവിധായകൻ; ആകാംക്ഷ നിറച്ച് ‘വഴിയെ’

കൊവിഡ് നിയന്ത്രണങ്ങള്‍ പാലിച്ച് ഈമാസം 19 മുതല്‍ ചിത്രീകരണം ആരംഭിക്കും. കണ്ണൂര്‍ ജില്ലയിലെ ചെറുപുഴയിലും ചിത്രീകരണം നടക്കുന്നുണ്ട്. പുതുമുഖങ്ങളായ ജെഫിന്‍ ജോസഫ്, അശ്വതി അനില്‍ കുമാര്‍ എന്നിവര്‍ പ്രധാന വേഷങ്ങളിലെത്തും. കാസബ്‌ളാങ്കാ ഫിലിം ഫാക്ടറിയുടെ ബാനറില്‍ ബേബി ചൈതന്യയാണ് ചിത്രം നിര്‍മ്മിക്കുന്നത്. ചിത്രത്തില്‍ പ്രസിദ്ധ ഹോളിവുഡ് സംഗീത സംവിധായകനും എണ്‍പതുകളിലേറെ ഹോളിവുഡ് സിനിമകള്‍ക്ക് സംഗീതമൊരുക്കിയ ഇവാന്‍ ഇവാന്‍സ് എത്തുന്നുവെന്നത് ഇതിനകം ദേശീയ മാധ്യമങ്ങളിലുള്‍പ്പെടെ വലിയ വാര്‍ത്തയായിട്ടുണ്ട്.

Also Read: 'ദൃശ്യം 2' തുടങ്ങും മുമ്പ് ആയുർവേദ ചികിത്സ നടത്തി മോഹൻലാൽ

അദ്ദേഹം പ്രവർത്തിക്കുന്ന ആദ്യ ഇന്ത്യന്‍ സിനിമ എന്ന പ്രത്യേകത കൂടിയുണ്ട്. മലയാളത്തില്‍ ആദ്യമായി ഫൗണ്ട് ഫൂട്ടേജ് സംവിധാനം ഉപയോഗപ്പെടുത്തി പുറത്തിറക്കുന്ന ആദ്യ ചിത്രമാണിത്. ചിത്രത്തിന്‍റെ അനൗണ്‍സ്‌മെന്‍റ് വീഡിയോയും ടൈറ്റില്‍ പോസ്റ്ററും ഇതിനകം പുറത്തിറങ്ങിയിട്ടുണ്ട്. കാസര്‍കോട് ജില്ലക്കാരായ വി നിഷാദ്, അരുണ്‍ കുമാര്‍ പനയാല്‍, ശരണ്‍ കുമാര്‍ ബാരെ തുടങ്ങിയവരാണ് മറ്റ് അണിയറപ്രവർത്തകരായുള്ളത്.

Also Watch :