ആമി വിവാദത്തിൽ വിദ്യയ്ക്ക് പറയാനുള്ളത്

സമീപകാലത്ത് ഏറെ ചര്‍ച്ചയായ 'ആമി' എന്ന ചിത്രത്തെ സംബന്ധിച്ച കമലിന്‍റെ പരാമര്‍ശത്തിന്മേൽ പ്രതികരണവുമായി ചിത്രത്തിലേക്ക് ആദ്യം പരിഗണിക്കപ്പെട്ട ബോളിവുഡ് നടി വിദ്യ ബാലൻ രംഗത്ത്. മലയാളത്തിന്‍റെ പ്രിയ കഥാകാരിയായ മാധവിക്കുട്ടിയുടെ ജീവിതകഥ പറയുന്ന ചിത്രമാണ് ആമി. ആമിയിൽ മാധവിക്കുട്ടിയുടെ വേഷം ആദ്യം അവതരിപ്പിക്കാന്‍ സമ്മതിച്ച അത് ചെയ്യുകയായിരുന്നെങ്കിൽ കൂടുതൽ ലൈംഗികത കടന്നുവരുമായിരുന്നു, എന്നാൽ മഞ്ജു ഈ കഥാപാത്രം അവതരിപ്പിക്കുമ്പോൾ അതില്ല എന്ന പരാമര്‍ശമാണ് വിവാദമായത്. ആമിയില്‍ നിന്ന് വിദ്യാ ബാലന്‍ പിന്മാറിയതില്‍ തനിക്ക് സന്തോഷം മാത്രമേ ഉള്ളൂവെന്നും കമൽ അഭിപ്രായപ്പെട്ടിരുന്നു. കമൽ ഒരു ഓൺലൈൻ മാധ്യമത്തിന് നൽകിയ അഭിമുഖത്തിലാണ് ഇക്കാര്യം പരാമര്‍ശിച്ചത്. ഇത് ദേശീയമാധ്യമങ്ങളുടെ വരെ ശ്രദ്ധയാകര്‍ഷിച്ചു. തുടര്‍ന്നാണ് വിദ്യ വിഷയത്തിൽ പ്രതികരണവുമായി എത്തിയത്.

വിദ്യ ചിത്രത്തിൽ നിന്ന് പിന്മാറിയതിന് കാരണമായി പറഞ്ഞത് കഥയുമായി ചില പൊരുത്തപ്പെടൽ ഇല്ലാത്തതിനാൽ എന്നാണ്. എന്നാൽ ബാഹ്യ പ്രേരണകൾ മൂലമാണ് വിദ്യയുടെ പിന്മാറ്റമെന്നാണ് കമൽ പറഞ്ഞത്. എന്നാൽ ഈ വിഷയത്തിൽ ഇതിനെക്കുറിച്ച് എനിക്ക് ഒന്നും പറയാനില്ലെന്നും പ്രത്യേകിച്ച് ഞാന്‍ എല്ലാം അവസാനിപ്പിച്ച സ്ഥിതിയ്ക്ക് കമലിന് മറുപടി നല്‍കാന്‍ ഉദ്ദേശമില്ലെന്നുമാണ് ടൈംസ് ഓഫ് ഇന്ത്യയോട് വിദ്യ ഈ വിഷയത്തിന്മേൽ പ്രതികരിച്ചത്.