Also Read: 'എൻ്റെ അമ്മയ്ക്ക് നവീനാ മകൻ, ഞാൻ മരുമകളാ'; അമ്മയ്ക്ക് തെലുങ്കോ കന്നഡയോ അറിയില്ല, വീട്ടിലെ അമ്മായിയമ്മ മരുമകൻ കോമ്പോ വൻ കോമഡിയാ, നവീൻ്റെ വീട്ടുകാർ കൂടുതലും തെലുങ്കാണ് പറയാറുള്ളത്, കുടുംബ വിശേഷങ്ങളുമായി ഭാവന!
സന്തോഷ് ശിവനൊപ്പം വിജയ് ദേവരക്കൊണ്ട
മലയാളത്തിലെ പ്രമുഖ സംവിധായകനും ഛായാഗ്രഹകനുമായ സന്തോഷ് ശിവന്‍ അവസാനമായി സംവിധാനം ചെയ്തത് മഞ്ജു വാര്യരും കാളിദാസ് ജയറാമും മുഖ്യ കഥാപാത്രങ്ങളെ അവതരിപ്പിച്ച ജാക്ക് ആൻ്റ് ജിൽ എന്ന സിനിമയായിരുന്നു. ഇതിനു മുൻപ് സന്തോഷ് ശിവൻ ഒരുക്കിയിരുന്നത് പൃഥ്വിരാജ് നായകനായെത്തിയ ഉറുമിയായിരുന്നു. ബിഗ് ബജറ്റിലൊരുക്കിയ ഉറുമി തിയറ്ററുകളെ പുളകം കൊള്ളിച്ച സിനിമകളിൽ ഒന്നായിരുന്നു എങ്കിൽ ജാക്ക് ആൻ്റ് ജിൽ തീയേറ്ററുകളിൽ വൻ പരാജയമായിരുന്നു. അതിലൊന്നും മനം മടുക്കാതെ ഇപ്പോഴിതാ വീണ്ടും സംവിധാനത്തിലേക്ക് സജീവമാവുകയാണ് സന്തോഷ് ശിവൻ.
മെഗാ ബജറ്റ് ചിത്രം
തെലുങ്കിലെ മുൻനിര സംവിധായകരിലൊരാളായ പുരി ജഗന്നാഥ് മിക്‌സഡ് മാർഷ്യൽ ആർട്‌സ് പശ്ചാത്തലമാക്കി ഒരുക്കുന്ന മെഗാ ബജറ്റ് ചിത്രമായ ലിഗർ ആഗസ്റ്റ് 25നാണ് തീയേറ്ററുകളിലെത്തുന്നത്. പാൻ ഇന്ത്യൻ റീലീസ് ആയാണ് ലിഗർ ആരാധകർക്ക് മുന്നിലേക്ക് എത്തുന്നത്. തെലുങ്കിലും ഹിന്ദിയിലുമായി ചിത്രീകരിച്ച സിനിമ മലയാളം ഉൾപ്പടെ മറ്റു അഞ്ച് ഭാഷകളിലേക്ക് കൂടി മൊഴി മാറ്റിയിട്ടുണ്ട്. പ്രശസ്ത ബോക്സിംഗ് താരം മൈക്ക് ടൈസൺ അഭിനയിക്കുന്നു എന്ന പ്രത്യേകതയും ഈ ചിത്രത്തിനുണ്ട്. ചിത്രത്തിന്റെ കേരള വിതരണവകാശം ശ്രീഗോകുലം മൂവീസിനാണ്. ഈ സിനിമയുടെ പ്രൊമോഷൻ പരിപാടിയ്ക്കിടെയാണ് വിജയ് ദേവരക്കൊണ്ട തൻ്റെ പുതിയ കഥാപാത്രത്തെ കുറിച്ച് വാചാലനായത്.
ഗോകുലം മൂവീസിനൊപ്പം
സന്തോഷ് ശിവനും ശ്രീ ഗോകുലം മൂവീസും ചേർന്ന് ഒരുക്കുന്ന അയ്യപ്പൻ എന്ന സിനിമയിൽ വിജയ് ദേവരക്കൊണ്ട നായകനായി എത്തുന്നുവെന്ന സർപ്രൈസ് പറഞ്ഞത് പരിപാടിയുടെ അവതാരകയാണ്. ഇത് ശരി വെച്ച് വിജയ് ദേവരക്കൊണ്ടയും പ്രതികരിച്ചു. കഥ കേട്ടുവെന്നും, ഡേറ്റ് നൽകിയെന്നും വലിയ സന്തോഷം എന്നുമായിരുന്നു വിജയ് ദേവരക്കൊണ്ട പ്രതികരിച്ചത്. മുൻപ് ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തില്‍ പ്രമുഖ നിര്‍മാതാവ് ഗോകുലം ഗോപാലനും അയ്യപ്പൻ എന്ന സിനിമയെ കുറിച്ച് തുറന്ന് പറഞ്ഞിരുന്നു.
പൃഥ്വിരാജിൻ്റെ അയ്യപ്പൻ സിനിമയും പ്രഖ്യാപിച്ചിരുന്നു
ശബരിമല സ്ത്രീ പ്രവേശന വിധിയെ ചൊല്ലി വിവാദങ്ങള്‍ തുടരുന്നതിനിടെ പ്രഖ്യാപിച്ച സിനിമയായിരുന്നു അയ്യപ്പന്‍. പൃഥ്വിരാജാണ് ഈ ചിത്രത്തിൽ നായകനാകുന്നത് എന്നും ഈ ചിത്രം ശങ്കര്‍ രാമകൃഷ്ണൻ ആണ് സംവിധാനം ചെയ്യുന്നത് എന്നുമുള്ള വിവരങ്ങൾ വർഷങ്ങൾക്ക് മുൻപ് പ്രഖ്യാപിച്ചപ്പോൾ പുറത്ത് വന്നിരുന്നു. ഈ സിനിമയുടെ ഫസ്റ്റ് ലുക്കും പൃഥ്വിരാജ് അന്ന് പുറത്ത് വിട്ടിരുന്നു. ഒരു വര്‍ഷം മുന്‍പാണ് ശങ്കര്‍ ഈ കഥ തന്നോട് പറയുന്നതെന്നും ഇതൊരു സ്വപ്‌ന സാക്ഷാത്കാരമാണെന്നും പൃഥ്വി പറഞ്ഞിരുന്നു. ഇതോടെ അയ്യപ്പനെ വെള്ളിത്തിരയില്‍ കാണുന്നതിന് വേണ്ടിയുള്ള കാത്തിരിപ്പിലായിരുന്നു ആരാധകര്‍. എന്നാൽ അതിനു പിന്നാലെയാണ് സന്തോഷ് ശിവനും അയ്യപ്പൻ എന്ന പേരിൽ ഒരു പുരാണ കഥ പറയുന്ന സിനിമ ഒരുക്കുന്നതായ റിപ്പോർട്ടുകൾ പുറത്ത് വന്നത്. ഈ റിപ്പോർട്ടുകളുമായി ബന്ധപ്പെട്ട പുതിയ വിവരങ്ങളാണ് ഇപ്പോൾ പുറത്ത് വന്നുകൊണ്ടിരിക്കുകയും നടൻ തന്നെ സ്ഥിരീകരണം നടത്തുകയും ചയ്യുന്നത്.
പ്രഖ്യാപനത്തിനു ശേഷം
ബിഗ് ബജറ്റില്‍ നിര്‍മ്മിക്കുന്ന ചിത്രം ശ്രീ ഗോകുലം മൂവീസിൻ്റെ ബാനറില്‍ ഗോകുലം ഗോപാലനാണ് നിര്‍മ്മിക്കുന്നത്. ഈ ചിത്രത്തിൻ്റെ പ്രീ പ്രൊഡക്ഷന്‍ ജോലികള്‍ ആരംഭിച്ചെന്നും ഓഗസ്‌റ്റിലോ സെപ്റ്റംബറിലോ ചിത്രീകരണം ആരംഭിക്കുമെന്നും ഗോകുലം ഗോപാലന്‍ മുൻപൊരു അഭിമുഖത്തില്‍ പറഞ്ഞിരുന്നു. ചിത്രത്തിന് തിരക്കഥ ഒരുക്കുന്നത് നവാഗതനായ പ്രശാന്താണ്. അയ്യപ്പൻ്റെ ജീവിതം വേറിട്ട കാഴ്ചപാടില്‍ നോക്കി കാണുന്ന തരത്തിലായിരിക്കും സിനിമ ഒരുക്കുന്നതെന്നും നിർമ്മാതാവ് അറിയിച്ചിരുന്നു. മലയാളം, തമിഴ്, തെലുങ്ക്, ഹിന്ദി എന്നിങ്ങനെ മൂന്ന് ഭാഷകളില്‍ ഒന്നിച്ചായിരിക്കും ഈ ചിത്രം റിലീസിനെത്തുകയെന്നും റിപ്പോർട്ടുകളുണ്ട്. സിനിമയ്ക്ക് വേണ്ടി സംഗീതമൊരുക്കാന്‍ തീരുമാനിച്ചിരിക്കുന്നത് പ്രമുഖ സംഗീത സംവിധായകന്‍ എആര്‍ റഹ്മാന്‍ ആണെന്നാണ് കേൾക്കുന്നത്.