'രാക്ഷസ'നിലെ ആ സൈക്കോ വില്ലന്‍ സാങ്കൽപിക കഥാപാത്രമല്ല

പ്രേക്ഷകര്‍ ഒന്നടങ്കം ഇപ്പോൾ പരസ്പരം സംസാരിക്കുന്നത് ആകാംക്ഷയും ഭീതിയും ഒരുപോലെ നിറയ്ക്കുന്ന ഏറ്റവും പുതിയ ചിത്രമായ രാക്ഷസനെ പറ്റിയാണ്. അത്രമേൽ നിരൂപക-പ്രേക്ഷക പ്രശംസ നേടി മുന്നേറുന്ന ചിത്രത്തിൽ ഏറെ ശ്രദ്ധിക്കപ്പെട്ടത് സൈക്കോ വില്ലനായെത്തിയ ക്രിസ്റ്റഫറാണ്. ഒറ്റ സംഭാഷണശകലം പോലുമില്ലാതെ പ്രേക്ഷകരെ ഭീതിയുടെ മുൾമുനയിൽ നിര്‍ത്തുന്ന പ്രകടനമാണ് ചിത്രത്തിലെ വില്ലൻ കഥാപാത്രത്തെ അവതരിപ്പിച്ച നടൻ പ്രതിഫലിപ്പിച്ചിരിക്കുന്നത്.

റിലീസ് ചെയ്ത് പിറ്റേന്ന് തന്നെ ചിത്രം ഇൻ്റര്‍നെറ്റിൽ പ്രത്യക്ഷമായെങ്കിലും തീയേറ്ററിലേക്കെത്തുന്ന പ്രേക്ഷകരുടെ എണ്ണത്തിൽ കുറവില്ല. അത് കലാപരമായും സാമ്പത്തിക പരമായും ചിത്രത്തെ വിജയത്തിലേക്ക് നയിക്കുന്നുണ്ട്. പ്രേക്ഷകരെ അത്രത്തോളം ഭയപ്പെടുത്തിയ ക്രിസ്റ്റഫര്‍ പക്ഷെ ഒരു സാങ്കല്പിക കഥാപാത്രമല്ലെന്നാണ് സംവിധായകന്‍ രാംകുമാര്‍ പറയുന്നത്. ഒരു യഥാര്‍ഥ കൊലയാളിയുടെ ജീവിതത്തെയാണ് താന്‍ പ്രേക്ഷകന് മുന്നില്‍ അവതരിപ്പിച്ചതെന്നും സംവിധായകന്‍ അടിവരയിട്ട് പറഞ്ഞു.

'ഒരു വേറിട്ട ചിത്രമൊരുക്കാന്‍ കാത്തിരിക്കവേയാണ് രണ്ടുപേരെ കുറിച്ച്‌ ഒരു ലേഖനം വായിക്കാനിടയായത്. മാനസിക വൈകല്യമുള്ള ഒരു കൊലയാളിയെയും ഒരു സ്ത്രീയെയും കുറിച്ചായിരുന്നു ആ ലേഖനം. അവര്‍ ഇന്ത്യക്കാരായിരുന്നില്ല. ഈ ലേഖനമാണ് സിനിമ ചെയ്യാൻ തന്നെ പ്രചോദിപ്പിച്ചത്. സിനിമ കെട്ടുകഥയാണ്, പക്ഷേ യഥാര്‍ഥ കഥാപാത്രത്തെ ആസ്പദമാക്കിയാണ് ചിത്രത്തിനായി വില്ലനെ സൃഷ്ടിച്ചത്. സംവിധായകൻ രാംകുമാര്‍ പറയുന്നു.

ചിത്രത്തിന് ആദ്യം സിന്‍ട്രെല എന്നായിരുന്നു ആദ്യം നൽകിയ പേര്. പിന്നീട് അത് മിന്‍മിനി എന്നാക്കി മാറ്റി, എന്നാൽ ഒടുവിൽ അത് രാക്ഷസനില്‍ എത്തിച്ചേരുകയായിരുന്നു. നാല് വര്‍ഷം മുന്‍പാണ് ചിത്രത്തിൻ്റെ തിരക്കഥ പൂര്‍ത്തിയാക്കിയതെന്നും രാം കുമാര്‍ വ്യക്തമാക്കി. ചിത്രത്തിലെ നായക കഥാപാത്രത്തെ അവതരിപ്പിക്കാനായി സംവിധായകന്‍ മുന്‍നിരയിലുള്ള ഒരുപാട് താരങ്ങളെ സമീപിച്ചിരുന്നു. എന്നാല്‍ അത് ശ്രമം വിഫലമാകുകയായിരുന്നു. പിന്നീടാണ് വിഷ്ണു വിശാലിലേക്ക് ചിത്രത്തിലെ നായക കഥാപാത്രം എത്തുന്നത്.

മുൻപ് ചിത്രത്തില്‍ അഭിനയിക്കാന്‍ താല്‍പര്യം കാട്ടി വിഷ്ണു വിശാല്‍ രാംകുമാറിനെ ബന്ധപ്പെടുകയും ചെയ്തിരുന്നു. അതും ഇതിലേക്കുള്ള വഴിയായി. പ്രമുഖ തമിഴ് ഓൺലൈൻ ചാനലുകൾക്ക് നൽകിയ വിവിധ അഭിമുഖങ്ങളിലായാണ് രാംകുമാര്‍ ഇക്കാര്യം വ്യക്തമാക്കിയത്.

സിനിമയിലെ ചെറിയ കലാകാരനായ ശരവണൻ നാനാണ് ആ വില്ലൻ കഥാപാത്രത്തെ അവതരിപ്പിച്ചത്. ഏറെ കഷ്ടപ്പെട്ടാണ് ശരവണൻ ഈ കഥാപാത്രത്തിനായി രൂപമാറ്റം നടത്തിയത്. ക്രിസ്റ്റഫര്‍ എന്ന വില്ലൻ്റെയും അയാളുടെ 'അമ്മ മേരിയുടെയും വേഷം അവതരിപ്പിച്ചതും ഒരേ വ്യക്തി തന്നെയാണ്. അമല പോളാണ് ചിത്രത്തിലെ നായിക. രാധാരവി, കാലി വെങ്കട്ട്, രാംദോസ് എന്നിവരും ചിത്രത്തിൽ മുഖ്യ കഥാപാത്രത്തെ കൈകാര്യം ചെയ്തിരിക്കുന്നു.