ഡബ്ല്യുസിസിയുടെ ഹ‍ർജി: എ.എം.എം.എയ്ക്ക് ഹൈക്കോടതി നോട്ടീസ്

കൊച്ചി: ലൈംഗിക ചൂഷണവുമായി ബന്ധപ്പെട്ട പരാതികൾ കൈകാര്യം ചെയ്യാൻ ആഭ്യന്തര സംവിധാനം ആവശ്യമാണെന്ന ആവശ്യത്തിൽ എ.എം.എം.എയ്ക്കും സംസ്ഥാന സർക്കാരിനും ഹൈക്കോടതി നോട്ടീസ്. വുമൻ ഇൻ സിനിമാ കലക്ടീവ് അംഗങ്ങളായ റിമ കല്ലിങ്കലും പദ്മപ്രിയയുമാണ് കോടതിയിൽ ഹർജി നൽകിയിരുന്നത്.

ചീഫ് ജസ്റ്റിസ് ഹൃഷികേഷ് റോയിയും ജസ്റ്റിസ് എ.കെ.ജയശങ്കർ നമ്പ്യാറും ചേർന്ന സമിതിയാണ് ഹർജി പരിഗണിച്ചത്. മലയാള സിനിമാരംഗത്ത് നിന്ന് നിരവധി ലൈംഗിക ചൂഷണ പരാതികൾ വന്നിട്ടുണ്ട്. ഇതിനെതിരെ കർശന നടപടി വേണമെന്ന് ഹർജിയിൽ ആവശ്യപ്പെടുന്നു.

എ.എം.എം.എയെയും സംസ്ഥാന സർക്കാരിനെയും എതിർ കക്ഷിയാക്കിയാക്കിയാണ് ഹർജി നൽകിയത്. ലൊക്കേഷനുകളിലെ ഇത്തരം മോശം പ്രവണതകൾക്കെതിരെ ശക്തമായ നടപടി വേണമെന്ന് ഡബ്ല്യു.സി.സി നേരത്തെ തന്നെ ആവശ്യപ്പെട്ടിരുന്നു.