ശബരിമല: നിലപാട് വ്യക്തമാക്കി വിമൻ ഇൻ സിനിമ കളക്ടീവ്

ശബരിമലയിൽ സുപ്രീംകോടതിയുടെ ഭരണഘടനാ ബെഞ്ചിൻ്റെ വിധിയിന്മേലുള്ള തങ്ങളുടെ നിലപാട് വ്യക്തമാക്കി മലയാള സിനിമയിലെ വനിതാ സംഘടനയായ വിമൻ ഇൻ സിനിമ കളക്ടീവ്. സുപ്രീംകോടതിയുടെ വിധിക്കൊപ്പമാണ് തങ്ങളെന്ന് വിമൻ ഇൻ സിനിമ കളക്ടീവ് അംഗങ്ങൾ.

സിനിമയിലെ വനിതകളുടെ കൂട്ടായ്മയായ വിമൻ ഇൻ സിനിമാ കളക്ടീവിൻ്റെ ഫേസ്ബുക്ക് പോസ്റ്റിലാണ് ഇക്കാര്യത്തിലെ തങ്ങളുടെ നിലപാട് വ്യക്തമാക്കിയത്. തങ്ങൾ ഇന്ത്യൻ ഭരണഘടനയ്ക്കൊപ്പമാണ് നില കൊള്ളുന്നതെന്ന് ഡബ്ല്യുസിസി ഫേസ്ബുക്ക് പോസ്റ്റിൽ കുറിച്ചു.

എന്നാൽ ശബരിമല എന്ന വാക്ക് പോസ്റ്റിൽ ഉപയോഗിച്ചിട്ടില്ല, അതേസമയം #ഭരണഘടനക്കൊപ്പം എന്ന ഹാഷ്ടാഗും ഫേസ്ബുക്ക് കുറിപ്പിനൊപ്പം ചേര്‍ത്തിട്ടുണ്ട്. സ്ത്രീയുടെ മാന്യമായ ജീവിതം ഉറപ്പാക്കാൻ നടത്തുന്ന ഓരോ ഇടപെടലിനുമൊപ്പവും തങ്ങൾ നിലകൊള്ളുന്നതായി ഡബ്ല്യുസിസി വ്യക്തമാക്കി.


കഴിഞ്ഞ ദിവസം ഡബ്യു സി സി അംഗം കൂടിയായ നടി പാര്‍വതി ശബരിമല സ്ത്രീ പ്രവേശന വിവാദത്തില്‍ നിലപാട് വ്യക്തമാക്കി രംഗത്തെത്തിയിരുന്നു. ആര്‍ത്തവം അശുദ്ധിയാണെന്ന് വിശ്വസിക്കുന്നില്ലെന്നും ആര്‍ത്തവത്തിൻ്റെ പേരിൽ സ്ത്രീകള്‍ക്കെതിരായ വിവേചനം അധിക കാലം തുടരാൻ സാധിക്കില്ലെന്നും പാര്‍വതി വ്യക്തമാക്കിയിരുന്നു.

ആര്‍ത്തവമുളള ദിവസങ്ങളില്‍ ക്ഷേത്രങ്ങളില്‍ പോകണമെന്ന് തനിക്ക് തോന്നിയാൽ താൻ പോകുമെന്നും ശബരിമല സ്ത്രീ പ്രവേശനം സംബന്ധിച്ച് സുപ്രീം കോടതി വിധിയോടൊപ്പമാണെന്നും നടി പാര്‍വതി അഭിപ്രായപ്പെട്ടിരുന്നു.

ഡബ്യുസിസി ശബരിമലയിലെ നിലപാടാണ് പ്രഖ്യാപിച്ചതെന്ന് കാട്ടി നിരവധി പേര്‍ പോസ്റ്റിന് താഴെ കമൻ്റുകളുമായി രംഗത്തെത്തി. അതിരു കടന്ന അസഭ്യ ഭാഷയിലാണ് പല കമന്‍റുകളും കുറിച്ചിരിക്കുന്നത്.