എ.എം.എം.എയിൽ പരാതി സെൽ വേണം; ഡബ്ല്യു.സി.സി ഹൈക്കോടതിയിലേക്ക്

കൊച്ചി: സിനിമാ മേഖലയിലെ ലൈംഗിക ചൂഷണം തടയാൻ ആഭ്യന്തര പരാതി സെൽ രൂപീകരിക്കണം എന്നാവശ്യപ്പെട്ട് വിമൻ ഇൻ സിനിമ കലക്ടീവ് ഹൈക്കോടതിയിൽ ഹർജി നൽകി. റിമ കല്ലിങ്കലും പത്മപ്രിയയും ആണ് ഹർജി നൽകിയിരിക്കുന്നത്. ഇത് നാളെ തന്നെ കോടതി പരിഗണിക്കും.

എ.എം.എം.എയെയും സംസ്ഥാന സർക്കാരിനെയും എതിർ കക്ഷിയാക്കിയാക്കിയാണ് ഹർജി. ലൊക്കേഷനുകളിലെ ഇത്തരം മോശം പ്രവണതകൾക്കെതിരെ ശക്തമായ നടപടി വേണമെന്ന് ഡബ്ല്യു.സി.സി നേരത്തെ തന്നെ ആവശ്യപ്പെട്ടിരുന്നു.

അതേ സമയം മലയാള സിനിമാരംഗത്ത് മീടു വെളിപ്പെടുത്തലുകൾ തുടരുകയാണ്. നടൻ അലൻസിയർക്കെതിരെ ആരോപണവുമായി നടി ദിവ്യ ഗോപിനാഥ് ആണ് രംഗത്തെത്തിയത്. ആരോപണം പാതി സത്യമാണെന്നാണ് ഇക്കാര്യത്തിൽ അലൻസിയർ പ്രതികരിച്ചത്. വിഷയത്തിൽ ദിവ്യക്ക് പൂർണപിന്തുണ പ്രഖ്യാപിച്ച് ഡബ്ല്യു.സി.സി രംഗത്തെത്തിയിരുന്നു.