ആഭാസം
Suraaj Venjarammoodu,Rima Kallingal,Shyam Sheetal,Indrans,Alencier Ley Lopez,Nassar,Nirmal Palazhi,Anil Nedumangad,Divya Gopinath,Mammukoya
സെൻസർഷിപ് വിവാദങ്ങളും റിമ കല്ലിങ്കൽ ഉയർത്തി വിട്ട ഫേസ്ബുക് ചർച്ചകളും കൊണ്ട് വാർത്തകളിൽ ഇടം നേടിയ "ആഭാസം" ആഭാസങ്ങളേതുമില്ലാതെ പുറത്തിറങ്ങി. വ്യത്യസ്തമായ പ്രമേയത്തിൽ നവാഗതനായ ജുബിത്ത് നമ്റാടത് തിരക്കഥയെഴുതി സംവിധാനം ചെയ്തിരിക്കുന്ന ചിത്രം ചൂടുള്ള വിഷയങ്ങളിലൊക്കെ തൊട്ടു കൊണ്ട് കൈ പൊള്ളിക്കാതെയുള്ള അഭ്യാസം തന്നെയായി. സമകാലിക പ്രശ്നങ്ങളിൽ പലതും കാണിച്ചു പോയെങ്കിലും ശക്തമായ ഇടപെടുലകളൊന്നും കണ്ടില്ല. ആർഷ ഭാരത സംസ്ക്കാരം എന്നതിന്റെ ചുരുക്കെഴുത്താണ് 'ആഭാസം '. ചൂണ്ടിക്കാണിക്കാൻ നായകനോ നായികയോ ഇല്ലാത്ത ഈ പരീക്ഷണ സിനിമയിൽ സമകാലിക സംഭവങ്ങളെ ആക്ഷേപ ഹാസ്യത്തിന്റെ മേമ്പൊടിയോടുകൂടി തൊട്ടു പോയിരിക്കുന്നു. ബാംഗ്ലൂർ നിന്നും കേരളത്തിലേക്കു പുറപ്പെടുന്ന ഡെമോക്രസി ട്രാവൽസിന്റെ 'ഗാന്ധി' ബസിനെ കേന്ദ്രികരിച്ചാണ് കഥ തുടങ്ങുന്നത്. ട്രാവൽസിന്റെ മറ്റു ബസുകളായ ജിന്ന , ഗോഡ്സെ ബസുകളും സർവീസ് നിർത്തിയ 'അംബേദ്കർ ' ബസുമൊക്കെ സിനിമയിൽ വന്നുംപോയുമിരുന്നു. ബസുകളെ വെച്ച് നടത്തിയ പല പരാമർശങ്ങളും സാധരണ പ്രേക്ഷകന്റെ തലയ്ക്കു മുകളിലൂടെ പോയ ബൗൺസറുകളായി. 'ഗാന്ധി' ബസിലെ ഡ്രൈവറായി എത്തിയ അലൻസിയറും കിളിയായി സുരാജ് വെഞ്ഞാറമൂടും മത്സരിച്ചഭിനയിച്ചു. സമൂഹത്തിന്റെ നേര്ക്കാഴ്ചയെന്നപോലെ വിവിധ തരക്കാരായ ബസിലെ യാത്രക്കാർ ഓരോരോ സാമൂഹിക പ്രശ്നങ്ങളിലേക്കുള്ള ചൂണ്ടുപലകയായി. വിവിധ മതക്കാർ,ഒരുപറ്റം ചെറുപ്പക്കാർ, സദാചാരവാദികൾ , ഒരു ട്രാൻസ് വുമൺ , അങ്ങിനെ ഓരോരുത്തരും ഓരോ വിഷയങ്ങളിലേക്കു കഥ കൊണ്ടുപോയി . യാത്രക്കാരായി എത്തിയ റിമയും ഇന്ദ്രൻസും ശീതൾ ശ്യാമും മികച്ച അഭിനയം കാഴ്ചവെച്ചു. പുറം ലോകമറിയാതെ പീഡനം സഹിക്കേണ്ടി വന്ന പെൺകുട്ടിയുടെ വേദന സിനിമ കണ്ടിറങ്ങുന്ന എല്ലാവരിലും നീറുന്ന ഓർമ്മയായി. ഇത്തരം സംഭവങ്ങളിൽ സമൂഹം പുലർത്തേണ്ട ജാഗ്രതയുടെ ഓർമ്മപ്പെടുത്തലാണ് ഈ വേദന. ഷാജി സുരേന്ദ്രനാഥിന്റെ വരികൾക്ക് ഊരാളി സംഗീത സംവിധാനം ചെയ്തിരിക്കുന്ന ഗാനങ്ങൾ വ്യത്യസ്തമായ അവതരണം കൊണ്ട് ശ്രദ്ധ നേടി. ആദ്യ പകുതിയിൽ സംഭവങ്ങളുടെ പെരുമഴയായിരുന്നു. ചരടിൽ നിന്നും ഊർന്നു പോയ മുത്തുമണികൾ പോലെ ഓരോന്നും വേറെ വേറെ ഇടങ്ങളിൽ തിളങ്ങി നിന്നു . ഇതൊക്കെ ഒറ്റച്ചരടിൽ കോർത്തെടുക്കുന്നതിൽ തിരക്കഥ വിജയിച്ചില്ല. രണ്ടാം പകുതിയിൽ കുറച്ചുകൂടെ താളത്തിലായ കഥയ്ക്കു കവിത പോലെ മനോഹരമായ ദൃശ്യങ്ങൾ മറ്റുകൂട്ടി . സംഭവബഹുലമായ ഒരു യാത്രയുടെ കഥയ്ക്കു കുറച്ചു കൂടെ മികച്ച അവസാനമാകമായിരുന്നുവെന്നു തോന്നിപ്പിക്കും വിധം സിനിമ പൊടുന്നനെ അവസാനിച്ചു. വ്യത്യസ്തമായ പ്രമേയത്തിന്റെ സത്യസന്ധമായ ആവിഷ്കരണമെന്ന നിലയിൽ പ്രേക്ഷകർക്കു കണ്ടിരിക്കാവുന്ന സിനിമയാണ് ആഭാസം.