റാസി
Alia Bhatt,Vicky Kaushal,Jaideep Ahlawat
Samayam Malayalam | 10 May 2018, 9:48 pm
ആലിയ ഭട്ട്, വിക്കി കൗശൽ എന്നിവർ കേന്ദ്ര കഥാപാത്രങ്ങളാകുന്ന പുതിയ ചിത്രം 'റാസി ' പ്രദർശനത്തിനെത്തി. ജംഗ്ലീ പ്രൊഡക്ഷൻസും ധർമ്മ പ്രൊഡക്ഷൻസും ചേർന്നാണ് ചിത്രം നിർമ്മിക്കുന്നത്. ആലിയ ഭട്ടും വിക്കിയും ആദ്യമായി ഒന്നിക്കുന്ന ചിത്രം ഒരുക്കുന്നത് മേഘ്ന ഗുൽസാർ ആണ്.പാകിസ്ഥാനി പട്ടാള ഉദ്യോഗസ്ഥനെ വിവാഹം കഴിക്കുന്ന കശ്മീരി പെൺകുട്ടിയുടെ കഥയാണ് ചിത്രത്തിന്റെ ഇതിവൃത്തം. മൂന്ന് ഗെറ്റപ്പിലാണ് ആലിയഭട്ട് എത്തുന്നത്. ചിത്രത്തില് പാക് സൈനിക ഉദ്യോഗസ്ഥനെ വിവാഹം ചെയ്യുന്ന കശ്മീരി യുവതി സെഹ്മത്തിന്റെ വേഷമാണ് ആലിയയ്ക്ക്. വിവാഹശേഷം പിതാവിൻ്റെ (രജിത് കപൂർ) നിർദേശ പ്രകാരം ഇന്ത്യന് ചാരയായി പ്രവര്ത്തിക്കാന് നിര്ബന്ധിതയാകുന്ന സെഹ്മതിന്റെ ജീവിതത്തിലെ സംഘര്ഷഭരിതമായ മുഹൂര്ത്തങ്ങൾ ആലിയ മനോഹരമായി കൈകാര്യം ചെയ്തിരിക്കുന്നു. ഒരേസമയം പട്ടാളക്കാരന്റെ ഭാര്യയും അതേസമയം ആരുമറിയാതെ ഖാലിദ് (ജയജീപ് അലാവത്ത്) എന്ന് ഇൻറലിജൻസ് ഒാഫീസറുടെ കീഴിൽ വിവിധ ആയുധങ്ങളില് പ്രാവീണ്യം നേടുന്ന ഒരുദ്യോഗസ്ഥ എന്ന രീതിയിലും ആലിയയുടെ വേഷപ്പകര്ച്ച ശ്രദ്ധിക്കപ്പെടുന്നു. മേഘ്ന ഗുല്സാര് സംവിധാനം ചെയ്യുന്ന ഈ ചിത്രം ഹരീന്ദര് സിംഗ് സിക്കയുടെ പുസ്തകമായ സെഹ്മത്തിന്റെ ദൃശ്യാവിഷ്കാരമാണ്. ആലിയയെ കൂടാതെ വിക്കി കൗശല് ചിത്രത്തില് പ്രധാന വേഷം കൈകാര്യം ചെയ്യുന്നു.1971 കളിലെ ഇന്ത്യ-പാകിസ്ഥാന് പ്രശ്നങ്ങളാണ് റാസിയിലൂടെ പറയുന്നത്. ആലിയയുടെ ഭർത്താവായ ഇക്ബാൽ ആയി എത്തുന്ന വിക്കി കൌശൽ തന്മയത്വമാർന്ന അഭിനയമായിരുന്നു. ഇക്ബാലിൻെറ പിതാവായ സയ്യദായി എത്തുന്ന ശിഷിർ ശർമ്മ കർക്കശനായ ബ്രിഗേഡിയറായി തിളങ്ങി. രാജ്യസ്നേഹമാണ് എല്ലാറ്റിനും വലുതെന്ന് കരുതുന്ന സെഹ്മത്തിൻ്റെ പിതാവ് മകളുടെ ജീവിതവും അതിനായി വിട്ടുകൊടുക്കുകയാണ്. ആലിയയുടെ സ്വന്തം അമ്മ സോണി റസ്ദാൻ തന്നെയാണ് ചിത്രത്തിലും അമ്മയാകുന്നത്. ഇൻ്റലിജൻസ് ഒാഫീസർ ഖാലിദ് - സെഹ്മത്ത് ബന്ധം ത്രില്ലിങ്ങായാണ് സംവിധായക പ്രേക്ഷകർക്ക് മുന്നിലെത്തിച്ചിരിക്കുന്നത്. ശങ്കർ - എഹ്സാൻ - ലോയ് ടീംമിൻ്റെ സംഗീതവും ഗുൽസാറിൻ്റെ വരികളും എഴുപതുകളെ പ്രതിധ്വനിപ്പിക്കുന്നു. ദേശീയത ഉണർത്തുന്ന ഗാനങ്ങളും ചിത്രത്തിൻ്റെ പ്രത്യേകതയാണ്. വസ്ത്രാലങ്കാരവും പ്രശംസനീയമാണ്. എല്ലാറ്റിനും മീതേ പ്രേക്ഷകരെ ഞെട്ടിക്കുന്ന ആലിയയുടെ തകർപ്പൻ അഭിനയമാണ് ചിത്രത്തിൻ്റെ ഹൈലൈറ്റ്. ഇൻഡസ്ട്രിയിലെ 'ക്യൂട്ട് ' കാറ്റഗറിയിൽ നിന്ന് മാറി അഭിനയ പ്രാധ്യാന്യമുള്ള വേഷങ്ങൾ ആലിയ തിരഞ്ഞെടുക്കുന്നത് പ്രശംസനീയമാണ്. ബോളിവുഡ് സിനിമകളിലെ ചാരക്കഥകളുടെ ക്ലീഷേകൾ ചിത്രം തകർക്കുന്നു. നാടകീയമായ മൂഹൂർത്തങ്ങളിലൂടെ കടന്ന് കിടിലൻ ക്ലൈമാക്സിൽ ചിത്രം എത്തി നിൽക്കുന്നു.