ഞങ്ങളെ പീഡിപ്പിച്ചോളൂ; പക്ഷേ സംഘീന്നൊക്കെ വിളിക്കല്ലേ...

ആനപ്രേമികളുടെ സ്വന്തം കൊമ്പനായ തെച്ചിക്കോട്ടുകാവ് രാമചന്ദ്രനെ തൃശൂര്‍ പൂരത്തിൽ നിന്നും വിലക്കിയ വാര്‍ത്ത വലിയ കോലാഹലങ്ങള്‍ക്കാണ് വഴിവെച്ചത്. വിലക്ക് നീക്കണമെന്നാവശ്യപ്പെട്ട് തൃശ്ശൂരില്‍ ബിജെപിയുടെ പ്രക്ഷോഭത്തിന് വരെ തുടക്കമിട്ടു. ഏതായാലും വിലക്ക് നീങ്ങി പൂരവിളംബരത്തിന് ഇറക്കാമെന്ന് നിയമോപദേശമൊക്കെ വന്നു. ഭാഗ്യം.


ശബരിമല അയ്യപ്പനാണോ തെച്ചിക്കോട്ട്കാവ് രാമചന്ദ്രനാണോ തൂക്കക്കൂടുതലെന്ന് ഇതിനിടെ അളന്ന് നോക്കിയെന്നാണ് ബിജെപിയെകുറിച്ച് ഈ വിഷയത്തിൽ ഉയര്‍ന്നുകേട്ട ട്രോള്‍. ഏത് വിഷയമാകട്ടെ ബി ജെ പിയുടെ രാഷ്ട്രീയ നിലനില്‍പു മാത്രമാണ് അവരുടെ ലക്ഷ്യമെന്ന് സോഷ്യൽമീഡിയയിലുള്‍പ്പെടെ ചര്‍ച്ചയാണ്. ആ നിലയ്ക്ക് ഗോമാതാവിനെ വിട്ട് ഇപ്പോള്‍ ഗജരാജനെ കടന്നുപിടിച്ചിരിക്കുകയാണ് ബിജെപിയെന്ന് കാണിച്ച് കാര്‍ട്ടൂണിസ്റ്റ് അനൂപ് രാധാകൃഷ്ണൻ വരച്ച കാര്‍ട്ടൂൺ ശ്രദ്ധ നേടുകയാണ്.

വടക്കേന്ത്യയിലൊക്കെ ഞങ്ങൾക്ക് അത് നല്ല ശീലാ എന്ന് തലവാചകമിട്ട് ഒരു ആനയും പശുവും തമ്മിലുള്ള സംഭാഷണമാണ് കാര്‍ട്ടൂണിൽ കാണിച്ചിരിക്കുന്നത്. പീഡനം എത്ര വേണോങ്കിലും സഹിക്കാം സംഘീന്നൊള്ള വിളിയാ പറ്റാത്തെയെന്ന് ഗജരാജൻ. ഇതുകേട്ട് നിസ്സംഗ ഭാവത്തിൽ സാരല്യ ശീലായിക്കോളുമെന്ന് ഗോമാതാവ് പറയുന്നതാണ് കാര്‍ട്ടൂണിലുള്ളത്. കാര്‍ട്ടൂൺ സോഷ്യൽമീഡിയയിൽ ചിരിപരത്തുകയാണ്.