മണിയാശാനേ...ഇത് ഭയങ്കര മറ്റേപ്പണി ആയിപ്പോയി !

ഇവിടം സ്വര്‍ഗ്ഗമാണ് എന്ന സിനിമയിലൂടെയാണ് ഈ അമിക്കസ് ക്യൂറി ഭയങ്കര ഫേമസായത്. അതേ അമിക്കസ് ക്യൂറി നമ്മടെ മണിയാശാന് ഇമ്മാതിരി പണികൊടുക്കോന്ന് കരുതിയില്ലാട്ടോ. കേരളത്തിൽ പ്രളയമുണ്ടാകാനുള്ള കാരണം അശാസ്ത്രീയമായി ഡാമുകൾ തുറന്നു വിട്ടതാണെന്ന അമിക്കസ് ക്യൂറി റിപ്പോർട്ടിൽ ഒന്നും പ്രതികരിക്കാതെ എന്തിനും പ്രതികരിക്കുന്ന മന്ത്രി എം.എം മണി ഇരുന്നല്ലോ...ഛെ...മോശം.

പ്രതികരണം ആരാഞ്ഞെത്തിയ മാധ്യമപ്രവർത്തകരോട് മേലാൽ തന്‍റെ വീട്ടിൽ കയറിപ്പോകരുതെന്നൊക്കെ പറഞ്ഞാണ് മണിയാശാൻ ആട്ടിപുറത്താക്കിയത്. ഏതായാലും മണിയാശാനെ നല്ല ഒന്നാന്തരം ട്രോള് കൊണ്ട് ഫേസ്ബുക്കിൽ മൂടിയിട്ടുണ്ട് അഡ്വ.ജയശങ്കര്‍.

''ഇത് ഭയങ്കര മറ്റേപ്പണി ആയിപ്പോയി!

ഈ തെരഞ്ഞെടുപ്പ് അടുത്ത കാലത്താണ് അമിക്കസ് ക്യൂറിയുടെ ഒലത്തിയ റിപ്പോർട്ട്. അതും നമുക്കു വേണ്ടി നാം സൃഷ്ടിച്ച നമ്മുടെ സ്വന്തം പ്രളയത്തെ കുറിച്ച്. അതും പോരാ, ഇനി ജുഡീഷ്യൽ അന്വേഷണവും നടത്തണം പോലും!

അമിക്കസ് ക്യൂറി അമേരിക്കൻ ഏജൻ്റാണ്. കേരളത്തിലെ ഇടതുപക്ഷ പുരോഗമന മതേതര സർക്കാരിനെ അട്ടിമറിക്കാനും അതുവഴി നവോത്ഥാനത്തെ പുറകോട്ടടിക്കാനുമുളള സാമ്രാജ്യത്വ ഗൂഢാലോചനയുടെ ദുർഭഗ സന്തതിയാണ് ഈ റിപ്പോർട്ട്.

അമിക്കസ് ക്യൂറി റിപ്പോർട്ടിനെതിരെ വർഗ ബഹുജന സംഘടനകളും സാംസ്കാരിക നായകരും ഉടൻ രംഗത്തു വരും.

#അമിക്കസ് ക്യൂറി അറബിക്കടലിൽ'', എന്നാണ് ജയശങ്കറിന്‍റെ ഫേസ്ബുക്ക് പോസ്റ്റ്.