ദശമൂലത്തിന്‍റെ സിംഹാസനം കീഴടക്കാനിതാ അരുൺ

'നെ‌ഞ്ചിനകത്ത് ദശമൂലം, നെഞ്ചു വിരിച്ച് ദശമൂലം. മീശ പിരിച്ച് ദശമൂലം, മുണ്ടു മടക്കി ദശമൂലം', ട്രോള്‍ ലോകത്ത് ദശമൂലം ദാമു ജൈത്രയാത്ര തുടങ്ങിയിട്ട് നാളുകളായി. ഏതു വിഷയമായാലും ദാമു മതിയെന്നാണ് ട്രോളന്മാരുടെ രഹസ്യം. ഷാഫിയുടെ സൂപ്പർഹിറ്റ് മമ്മൂട്ടി ചിത്രം ചട്ടമ്പിനാടിലെ ശ്രദ്ധിക്കപ്പെട്ട കഥാപാത്രമായിരുന്നു ദശമൂലം ദാമു. സുരാജ് വെഞ്ഞാറമൂട് അവതരിപ്പിച്ച ദാമു രമണനും മണവാളനുമൊപ്പം ഇങ്ങനെ ട്രോള്‍ ലോകം അടക്കി വാഴുകയായിരുന്നു. ആ നിസ്സംഗഭാവവും പിരിച്ച മീശയിലും ആരും ഒന്നു വീണുപോകും.

ഇപ്പോഴിതാ കരിക്കിലെ തേരാപാര സീരിസിലൂടെ ശ്രദ്ധ നേടിയ പിള്ളേരുടെ കൂട്ടത്തിൽ ഒരാള്‍ ദശമൂലത്തെ വെല്ലാൻ തുനിഞ്ഞിരിക്കുകയാണ്. ഇവരുടെ പ്ലസ് ടു ഫ്രീ പിരീഡ് വീഡിയോയിലെ അരുൺ എന്ന കഥാപാത്രത്തെ അവതരിപ്പിച്ച തേരാപാരയിലെ ഫ്രാൻസിസാണ് കക്ഷി.

എല്ലാ പ്ലസ് ടു ക്ലാസുകളിലുമുള്ളപോലൊരു മിഡിൽ ബെഞ്ചര്‍. കോപ്പിയടിക്കാൻ ബാക്ക് ബെഞ്ചര്‍മാരുമായി ഐഡിയ ഉണ്ടാക്കുന്ന ടീച്ചര്‍ ചോദ്യം ചോദിക്കുമ്പോള്‍ ചോദിക്കാതിരിക്കാൻ എല്ലാമറിയുന്നയാളെപ്പോലെ ഇരിക്കുന്ന പോലൊരാള്‍. അരുണിന്‍റെ ചിരിച്ചുള്ള ആ ഇരുത്തവും നിസ്സംഗമനോഭാവവുമൊക്കെ ഇടക്കൊക്കെ ദാമുവിനെ ഓര്‍മ്മിക്കുന്നതായിരുന്നുവെന്നാണ് ട്രോളന്മാരുടെ പക്ഷം. ഇപ്പോഴിതാ അങ്ങനെ വര്‍ഷങ്ങള്‍ക്ക് ശേഷം ദശമൂലത്തിന് ഒരു എതിരാളി എത്തിയിരിക്കുകയാണ്. ഇനി ഈ അരുൺ ട്രോള്‍ ലോകം അടക്കി വാഴുമോ എന്ന് കാത്തിരുന്ന് കാണാം.