ഉയ്യെന്‍റപ്പാ ദേ കൊല്ലെടാ വന്നേ...

ബെംഗലൂരുവിലേക്ക് പോയ കല്ലട ബസ്സില്‍ യാത്ര ചെയ്‍തിരുന്ന യുവാക്കളെ ജീവനക്കാര്‍ ക്രൂരമായി മര്‍ദ്ദിച്ച സംഭവമാണ് ഇന്ന് ഏറെ വിവാദമായിരിക്കുന്നത്. സംഭവത്തിൽ ബസിന്‍റെ പെര്‍മിറ്റ് റദ്ദാക്കുകയും ജീവനക്കാരെ അറസ്റ്റ് ചെയ്യുകയും ചെയ്തിരിക്കയാണ്.
സംഭവത്തിൽ സോഷ്യൽമീഡിയയിലും രോഷം പുകയുകയാണ്. കല്ലടയെ കൊല്ലെടോ എന്നു വിളിച്ചാണ് സോഷ്യൽമീഡിയയിൽ ആക്ഷേപം. ഉയ്യെന്‍റപ്പാ എന്ന ആക്ഷേപഹാസ്യ പേജിലാണ് കൊല്ലെടോ ട്രാവൽസ് എന്നുവിളിച്ച് കല്ലടയെ കളിയാക്കിയിരിക്കുന്നത്.
യാത്രക്കാരെ ആക്രമിച്ച കല്ലട ട്രാവൽസിനെ റെഡ്ബസ് ആപ്പിൽ നിന്നും ഒഴിവാക്കുന്നത് വരെ ആപ്പ് സ്റ്റോറിൽ 1 സ്റ്റാർ റേറ്റിംഗ് കൊടുത്ത് പ്രതിഷേധിക്കുകയെന്നും കല്ലടയെ ഒഴിവാക്കിയാൽ 5 സ്റ്റാര്‍ നൽകാമെന്ന് സന്ദേശം എഴുതണമെന്നും ഉള്‍പ്പെടെ വാട്സാപ്പിൽ പ്രചാരണവും നടക്കുന്നുണ്ട്.
മാത്രമല്ല കല്ലട ട്രാവൽസിനേയും ജീവനക്കാരേയും അടപടലം ട്രോളി ട്രോള്‍ ഗ്രൂപ്പുകളിൽ ട്രോളുകളും സജീവമായി നിറയുകയാണ്. ഞങ്ങളുടെ സേവനം തിരുവനന്തപുരം മുതൽ ബാംഗ്ളൂർ വരെ ഉഴിച്ചിൽ പിഴിച്ചിൽ എന്നൊക്കെ കല്ലടയെ വിശേഷിപ്പിച്ചാണ് ട്രോളുകള്‍.