കിടുക്കാച്ചി വീഡിയോയുമായി കരിക്ക് ടീം വീണ്ടും

നര്‍മ്മം കലര്‍ന്ന മിനി വെബ് സീരീസുകളിലൂടെ യൂട്യൂബിൽ ട്രെൻഡായി മാറിയ ടീമാണ് കരിക്ക് യൂട്യൂബ് ചാനൽ. ഇവരുടെ തേരാപാര സീരീസാണ് ഏറെ ശ്രദ്ധിക്കപ്പെട്ടത്. സീരീസിലെ ഷിബുവും ലോലനും ജോര്‍ജ്ജും ബ്രിട്ടോയും ശംഭുവുമൊക്കെ ഏറെ ശ്രദ്ധനേടിയ കഥാപാത്രങ്ങളാണ്. കൂട്ടത്തിൽ ലോലനും ജോര്‍ജ്ജുമാണ് ഏറെ ആരാധകരെ സ്വന്തമാക്കിയത്. മാത്രമല്ല ജോര്‍ജ്ജും ബ്രിട്ടോയുമായി അഭിനയിക്കുന്നവര്‍ അടുത്തിടെ സിനിമാപ്രവേശനവും നടത്തുകയുണ്ടായി.

ലോലൻ തന്‍റെ പ്രേമഭാജനമായ അശ്വതി അച്ചുവിനെ കണ്ടുമുട്ടുന്നതുമായി വന്ന തേരാപാരയുടെ 20-ാം എപ്പിസോഡിന് ശേഷം അടുത്ത ഒരു വീഡിയോയുമായി എത്തിയിരിക്കുകയാണിപ്പോള്‍ കരിക്ക് ടീം. പ്ലസ് ടു ഫ്രീ പിരീഡ് എന്നാണ് വീഡിയോയ്ക്ക് പേരിട്ടിരിക്കുന്നത്.

ദര്‍ശന സിഎ അക്കാദമിയുടെ പരസ്യത്തിനായുള്ള മാതൃകയിലാണ് ഈ വീഡിയോ ഒരുക്കിയിരിക്കുന്നത്. വീഡിയോയിൽ കലിപ്പനായാണ് ലോലൻ എത്തുന്നതെന്നാണ് പ്രത്യേകത. മാത്രമല്ല ഇരട്ടകളുമാണ്. പേരിനും വ്യത്യാസമുണ്ട്. എല്ലാവരുടേയും പേരിന് വ്യത്യാസം ഉണ്ട്. ഒരു സ്കൂളിലെ പ്ലസ് ടു ഫ്രീ പിരീഡ് ക്ലാസിലെ രസകരമായ സംഭവങ്ങളാണ് വീഡിയോയിൽ ആവിഷ്കരിച്ചിരിക്കുന്നത്. കിടുക്കാച്ചി ഐറ്റവുമായ് വീണ്ടും കരിക്ക് ടീം ഞെട്ടിച്ചുവെന്നും ഏവരും പറയുകയാണ്.