പൂരത്തിന് ആനയെ എഴുന്നള്ളിക്കൽ വീണ്ടും ചര്ച്ചയായിരിക്കുന്ന സാഹചര്യത്തിൽ ആനയ്ക്ക് പകരം ആനവണ്ടിയെ എഴുന്നള്ളിച്ച് ഒരു ഉത്സവം. കൊട്ടാരക്കരയിലാണ് കെഎസ്ആർടിസി ബസ് നെറ്റിപട്ടം കെട്ടി ആനയ്ക്ക് പകരം എഴുന്നള്ളിച്ചത്. ശ്രീ മഹാഗണപതി ക്ഷേത്രത്തിലെ മേടതിരുവാതിര മഹോത്സവത്തോടനുബന്ധിച്ചായിരുന്നു ഈ കൗതുക കാഴ്ച ആളുകള്ക്ക് വിരുന്നായത്.
കെഎസ്ആർടിസി കൊട്ടാരക്കര ഡിപ്പോയിലെ മൊബൈൽ വർക്ക് ഷോപ്പ് ബസാണ് ഉത്സവത്തിന് എഴുന്നള്ളിച്ചത്. നെറ്റിപ്പട്ടം കെട്ടിച്ച് പൂമാലയും തോരണങ്ങളും ബലൂണുകളുമൊക്കെയായി അലങ്കരിച്ച് സാക്ഷാൽ ഒരു ലക്ഷണമൊത്തെ ഗജരാജനെപ്പോലെതന്നെയാണ് ആനവണ്ടി അലങ്കരിച്ച് എത്തിയത്. ആനവണ്ടി എഴുന്നള്ളിപ്പ് കാണാൻ നിരവധിയാളുകള് റോഡിനിരുവശവും തടിച്ചുകൂടുകയായിരുന്നു.
കൊട്ടാരക്കര കെഎസ്ആർടിസി വർഷം തോറും ഉത്സവാഘോഷങ്ങളുടെ ഭാഗമായി കൂടെക്കൂടാറുണ്ട്. ഇക്കുറി വ്യത്യസ്തമായി എന്തെങ്കിലും ചെയ്യണമെന്ന ചിന്തയിലാണ് ആനവണ്ടിയെ ആനയാക്കി എഴുന്നള്ളിയ്ക്കാനുള്ള ആശയം മനസ്സിലുദിച്ചതെന്ന് ഡിപ്പോ ജീവനക്കാര് പറഞ്ഞു.
കൊട്ടാരക്കര കെഎസ്ആർടിസി വർഷം തോറും ഉത്സവാഘോഷങ്ങളുടെ ഭാഗമായി കൂടെക്കൂടാറുണ്ട്. ഇക്കുറി വ്യത്യസ്തമായി എന്തെങ്കിലും ചെയ്യണമെന്ന ചിന്തയിലാണ് ആനവണ്ടിയെ ആനയാക്കി എഴുന്നള്ളിയ്ക്കാനുള്ള ആശയം മനസ്സിലുദിച്ചതെന്ന് ഡിപ്പോ ജീവനക്കാര് പറഞ്ഞു.