പേജ് കാക്ക കൊണ്ട് പോകാതിരിക്കാൻ ഐസിയുവും സിന്ദൂരം തൊട്ടു; കാക്കയും സിന്ദൂരവും, ട്രോൾ മഴ

നിയമത്തെ അനുകൂലിക്കുന്നവർക്കിടയിലേക്ക് ചോദ്യവുമായെത്തിയ യുവതിയോട് സംഘത്തിലുണ്ടായിരുന്ന സ്ത്രീയാണ് സിന്ദൂരം തൊട്ട് നടക്കുന്നത് മക്കളെ 'കാക്ക' തൊടാതിരിക്കാനാണെന്ന് പറഞ്ഞത്. 'ഞാൻ ഇത് തൊട്ടു നടക്കുന്നത് എന്തിനാണെന്ന് അറിയാമോ, എനിക്ക് രണ്ടു പെണ്മക്കളുണ്ട്. അവരെ ഒരു കാക്കയും തൊടാതെയിരിക്കാൻ ആണ്' എന്നായിരുന്നു സ്ത്രീയുടെ വാക്കുകൾ.

സംഭവത്തിന്‍റെ വീഡിയോ ദൃശ്യങ്ങൾ പ്രചരിച്ചതോടെ 'പണികിട്ടിയത്' നമ്മുടെ പാവം കാക്കയ്ക്കാണ്. കാക്ക കൊത്താതിരിക്കാൻ സിന്ദൂരം ചാർത്തുന്ന മാങ്ങവരെ ട്രോളുകളിൽ കഥാപാത്രമായിട്ടുണ്ട്. ഇന്നലെ കൊച്ചിയിലായിരുന്നു വിവാദത്തിന് അടിസ്ഥാനമായ സംഭവം അരങ്ങേറിയത്.

കലൂരിലെ ഒരു ക്ഷേത്രത്തിനു സമീപത്ത് നടന്ന സിഎഎ അനുകൂല പരിപാടിക്കിടെ എതിരഭിപ്രായം രേഖപ്പെടുത്തിയ യുവതിയെയാണ് അവിടെയുണ്ടായിരുന്ന സ്ത്രീകൾ സംഘം ചേർന്ന് നേരിട്ടത്. വർഗീയ പരാമർശത്തിനു പുറമെ യുവതിക്ക് നേരെ കൈയ്യേറ്റ ശ്രമവും നടന്നിരുന്നു.

വാവുബലിക്ക് കാക്ക ബലിച്ചോർ കഴിക്കാൻ വരാത്തതിനു കാരണം കുലസ്ത്രീയായ മകൾ സിന്ദൂരം തൊട്ട് നിൽക്കുന്നതാണെന്നാണ് ചില ട്രോളന്മാരുടെ കണ്ടെത്തൽ. രസകരമായ പോസ്റ്റുകൾക്ക് കീഴിൽ രസകരമായ കമന്‍റുകളാണ് വരുന്നത്.

ഫേസ്ബുക്കിലെ ട്രോൾ പേജായ ഐസിയു തങ്ങളുടെ പ്രൊഫൈൽ പിക്ചറിൽ തന്നെ സിന്ദൂരവുമായെത്തിയതും രസകരമായ കാഴ്ചയായി. പേജ് കാക്ക കൊത്തി കൊണ്ടുപോകാതിരിക്കാൻ എന്ന കമന്‍റോടൊണ് ഐസിയു ചിത്രം പോസ്റ്റു ചെയ്തത്.

ഇനി വീടിനു പുറത്തേക്ക് മക്കളെയും കൊണ്ട് പുറത്തിറങ്ങുമ്പോൾ സിന്ദൂരം തൊടുന്നത് നിർബന്ധമാണെന്നാണ് ചിലരുടെ ട്രോളുകൾ. സിന്ദൂരം തൊട്ടാൽ ബാക്കിയൊന്നും പേടിക്കാനില്ലെന്നും എല്ലാം ഓക്കെയാകുമെന്നുമാണ് ഈ ട്രോളന്മാർ പറയുന്നത്.

കൊച്ചിയിലെ 'കാക്ക' വീഡിയോയിൽ ട്രോളുകളുമായി ഇറങ്ങിയ മലയാളികൾ പറക്കുന്ന കാക്കയെ മാത്രമല്ല, ഫുട്ബോൾ താരം കാകയെയും വിഷയവുമായി ബന്ധപ്പെടുത്തിയിട്ടുണ്ട്. സിന്ദൂരം തൊടുന്നതിനു കാരണം താനാണെന്ന് കേൾക്കുന്ന കാകയുടെ ഭാവമാണ് ട്രോളിലുള്ളത്.

സോഷ്യൽ മീഡിയ ട്രോളുകളിൽ കഴിഞ്ഞ ദിവസങ്ങിൽ ട്രെൻഡായിരുന്ന പ്രാദേശിക അവാർഡുകൾക്ക് സമാനമായി യുവതിയോട് കയർത്ത സ്ത്രീക്ക് കാക്കതൊടാത്തമ്മ അവാർഡ് സമർപ്പിച്ചും ചിലർ രംഗത്തെത്തിയിട്ടുണ്ട്. സിന്ദൂരം തൊട്ട് കാക്കയിൽ നിന്ന് മക്കളെ രക്ഷിച്ചതിനുള്ള പുരസ്കാരമെന്നാണ് ഇതിനെ വിശേഷിപ്പിച്ചിരിക്കുന്നത്.