സാംസങ് നോട്ടിന് പിന്നാലെ വാഷിങ് മെഷീനുകളും പൊട്ടിത്തെറിക്കുന്നു

വാഷിങ്‍ടൺ: ഫോണിന് പിന്നാലെ സാംസങിന് പണി നൽകി വാഷിങ് മെഷീനും. ബാറ്ററി പൊട്ടിത്തെറിക്കുന്നതിനെ തുടർന്ന് ആഗോള വ്യാപകമായി വിൽപന നിർത്തിവെക്കേണ്ടി വന്ന സാംസങ് ഗാലക്സി നോട്ടിന് പിന്നാലെ പൊട്ടിത്തെറിയുമായി സാംസങ് വാഷിങ് മെഷീനുകളും.

ഡോറുകൾ പൊട്ടിത്തെറിച്ച സംഭവങ്ങൾ പലയിടത്തുനിന്നായി റിപ്പോർട്ട് ചെയ്തതിനെ തുടർന്ന് 28 ലക്ഷത്തോളം വാഷിങ് മെഷീനുകൾ കമ്പനി തിരിച്ചു വിളിക്കാൻ തീരുമാനിച്ചിട്ടുണ്ട്. ഡോറിന്‍റെ പ്രശ്നം പരിഹരിക്കുന്നതിനാണ് വാഷിങ് മെഷീനുകൾ തിരിച്ചു വിളിക്കുന്നത്.

ഡോർ പൊട്ടിത്തെറിച്ച് ഒരാളുടെ താടിയെല്ല് തകർന്നതായി നേരത്തെ അമേരിക്കൻ മാധ്യമങ്ങൾ റിപ്പോർട്ട് ചെയ്തിരുന്നു. 2011 മാർച്ച് മുതൽ പുറത്തിറക്കിയ 34 മോഡലുകളാണ് തിരിച്ചു വിളിക്കുന്നത്. തുടർച്ചയായ പൊട്ടിത്തെറികൾ തുടർന്ന് സാംസങിന്‍റെ വിപണി മൂല്യം ഇടിഞ്ഞു.

massive recall of exploding samsung washing machines