Onam Rituals : ഓണം ഇങ്ങനെ പെണ്ണോണമാകും...

ഓണക്കാലം കളികളുടേയും ഒപ്പം സ്ത്രീ ജനങ്ങളുടേയും കൂടി കാലമാകുന്നു അടുക്കളയിലെ മിടുക്കു മാത്രമല്ല, ഇത് സ്ത്രീകളുടെ എന്നു പറയാന്‍ കാരണം. സദ്യയൊരുക്കം മുതല്‍ നിലവിളക്കു കൊളുത്തുന്നതു വരെയെുള്ള ജോലികള്‍ സ്ത്രീകളുടേതാണ് എന്നതുമല്ല, കാരണം. ഓണത്തിന്റെ പല മേഖലകളിലും ഇപ്പോഴും പെണ്ണോണം എന്നു പേരിട്ടു വിളിയ്ക്കാവുന്ന കാര്യങ്ങള്‍ ഏറെയുണ്ട്.

ഓണത്തിന്റെ ചിത്രങ്ങള്‍ നോക്കുക. മിക്കവാറും സ്ത്രീകളായിരിയ്ക്കും, ഇതിനൊക്കെ മോഡലായി വരുന്നത്. സെറ്റുസാരിയും സെറ്റുമുണ്ടുമെല്ലാം ഓണത്തേയും കൂടി പ്രതിനിധീകരിയ്ക്കുന്നു. ഓണത്തിന്റെ അന്ന് അടുക്കള ഡ്യൂട്ടി മാത്രമല്ല, ഓണത്തോട് അനുബന്ധിച്ചുള്ള തിരുവാതിരക്കളി പെണ്‍വസന്തമാണ്. മുണ്ടും നേര്യതുമിട്ട് മുല്ലപ്പൂ ചൂടി ആഭരങ്ങള്‍ അണിഞ്ഞ് വട്ടത്തില്‍ താളത്തില്‍ പാടി ചുവടു വയ്ക്കുന്ന പെണ്‍കൊടികളുടെ ചന്തം പല തറവാടുകളുടെ നടുമുറ്റങ്ങളിലും പണ്ടു കാലത്തെ ഓണക്കാഴ്ചയായിരുന്നു. ഊണു കഴിഞ്ഞ് വെടിവട്ടം പറഞ്ഞിരിയ്ക്കുന്ന സ്ത്രീകള്‍ക്കിടയില്‍ ഇതും നേരം പോക്കാണ്. പൊതുവേ വീട്ടിലുള്ള കളികള്‍ക്ക് പ്രാമുഖ്യം സ്ത്രീകള്‍ക്കാണ്. പുരുഷപ്രജകള്‍ക്ക് ഓണത്തല്ല്, പുലിക്കളി പോലുളള പുറം കളികളായിരിയ്ക്കും പൊതുവേ പഥ്യവും.

ഊഞ്ഞാലാട്ടവും കുട്ടികള്‍ക്കും ഒപ്പം സ്ത്രീകള്‍ക്കുമെന്നു പറഞ്ഞാലും തെറ്റില്ല. പുരുഷന്മാര്‍ ഊഞ്ഞാലില്‍ ആടുന്ന ചിത്രം പൊതുവേ ഇത്തരം ആഘോഷക്കാഴ്ചകളില്‍ കാണാറുമില്ല. ഊഞ്ഞാലാട്ടം മാത്രമല്ല, പണ്ടു കാലത്ത് തുമ്പിതുള്ളല്‍ എന്നൊരു ചടങ്ങുമുണ്ടായിരുന്നു. ഇതും പെണ്‍കിടാങ്ങളുടേതു തന്നെ. ഒരു വട്ടം സ്ത്രീകള്‍ക്ക് നടുവിലായി കയ്യില്‍ ഒരു പിടി ഓണത്തുമ്പ പിടിച്ചിരിയ്ക്കുന്ന ഒരു സ്ത്രീയോ പെണ്‍കുട്ടിയോ. ചുറ്റുമുള്ളവര്‍ ഈണത്തില്‍ പാട്ടുകള്‍ പാടി നടുവിലെ ആളെ തുള്ളിയ്ക്കുക എന്നതാണ് ഇത്. പാട്ടിന്റെ ഈണവും താളവും വേഗവും നടുവിലിരിയ്ക്കുന്ന പെണ്‍കിടാവിനേയും ആവേശം കൊള്ളിയ്ക്കും. മുടിയഴിച്ച് വൃത്താകൃതിയില്‍ ഇവര്‍ ആടിത്തുടങ്ങും. ക്രമേണ വേഗം കൂടും. സര്‍പ്പപ്പാട്ടിനോട് അനുബന്ധിച്ചുള്ള സര്‍പ്പം തുള്ളലിനോട് സാമ്യമുള്ള ഒന്നാണിത്.