ഓണസദ്യ വിളമ്പാന്‍ ചിട്ടകളുണ്ട്‌

ഓണത്തിന് ഓണസദ്യ പ്രധാനമാണ്. സദ്യ എങ്ങനെയെങ്കിലും കഴിച്ചാല്‍ പോരാ. അതിന്റേതായ എല്ലാ ചിട്ടവട്ടങ്ങളോടെയും തന്നെ ഓണസദ്യ കഴിക്കേണ്ടതാണ്.സദ്യ ഉണ്ണുന്നതിന് ശാസ്ത്രമുണ്ട്. ഇതു പോലെ തന്നെ സദ്യ വിളമ്പുന്നതിനും ശാസ്ത്രമുണ്ട്. 12 ലധികം വിഭവങ്ങള്‍ ചേരുന്നതാണ് ഓണസദ്യ. എന്നാല്‍ പരമ്പരാഗത സദ്യയില്‍ 26 ലധികം വിഭവങ്ങളുണ്ടായിരിക്കും.പായ നിലത്തു വിരിച്ച് തുശനിലയില്‍ വേണം, ഓണസദ്യയുണ്ണാന്‍. തൂശനിലയുടെ കൂര്‍ത്ത ഭാഗം ഇരിയ്ക്കുന്നയാളുടെ ഇടതു ഭാഗത്തു വരണം. അതായത് വണ്ണം കുറഞ്ഞ അറ്റം ഭാഗം. ഓരോരോ വിഭവങ്ങള്‍ ഇലയുടെ ഓരോ ഇടങ്ങളില്‍ വേണം, വിളമ്പാന്‍.

ഇലയുടെ നടുവിലായി ആവശ്യത്തിന് ചോറ് വിളമ്പാം. കായ വറുത്തത്, ശര്‍ക്കരവരട്ടി എന്നിവ തൂശനിലയുടെ തുഞ്ചത്തായി ഇടതു ഭാഗത്ത് വിളമ്പണം. ഇടതു മൂലയില്‍ അച്ചാറും ഇഞ്ചിപ്പുളിയുമെല്ലാം വിളമ്പണം. ഇടതു വശത്ത് ഇലയുടെ താഴത്തായാണ് പഴം വയ്ക്കുക. പപ്പടം ഇതിനു മുകളില്‍ വയ്ക്കണം. മുഴുവനോടെ കാച്ചിയ പപ്പടമാണ് സദ്യയ്ക്ക് ഉപയോഗിയ്ക്കുക. ഇതിന് അപ്പുറത്തായി പച്ചടി, കിച്ചടി എന്നിവ വിളമ്പുന്നു. മധ്യത്തില്‍ നിന്നും തുടങ്ങി വലതു ഭാഗത്തേക്കായി അവിയല്‍, തോരന്‍, കാളന്‍, ഓലന്‍, കൂട്ടുകറി മുതലായവ വിളമ്പുന്നു.

സാമ്പാര്‍ സാധാരണയായി ചോറിനു നടുവിലാണ് ഒഴിയ്ക്കുന്നത്. ആദ്യം സാമ്പാര്‍ കൂട്ടിയല്ല ഉണ്ണുക. ആദ്യം നെയ്യും പരിപ്പും കൂട്ടി വേണം, കഴിയ്ക്കാന്‍. ഇതിനൊപ്പം പപ്പടവും കൂട്ടാം. പിന്നീട് സാമ്പാര്‍ കൂട്ടി കഴിയ്ക്കാം. പിന്നീട് പുളിശേരി. ചിലയിടത്ത് പുളിശേരി കൂട്ടി മൂന്നാമതുണ്ടാകില്ല. ഇതിനു ശേഷം മോര്, രസം എന്നിവ ചേര്‍ത്ത് ഊണ് എന്നതാണ് പതിവ്. പിന്നീട് പായസം,പായസം കഴിക്കുമ്പോള്‍ ഇടക്കൊന്ന് തൊട്ടുനക്കുന്നതിന് അല്‍പം അച്ചാറും കൈയ്യെത്തും അരികെ ഉണ്ടാവുന്നത് നല്ലതാണ്. ഇത് പായസത്തിന്റെ മത്തിനെ ഇല്ലാതാക്കി ഒരു ആശ്വാസം നല്‍കുന്നു. പായസത്തിനൊപ്പം ഒരു പപ്പടവും പൊടിച്ച് ചേര്‍ത്ത് കഴിയ്ക്കുന്ന രീതിയും ഉണ്ട്. പിന്നീട് അവസാനം പഴം കഴിയ്ക്കാം. ഊണു കഴിഞ്ഞ് ഇല മടക്കുന്നതിനും രീതിയുണ്ട്. സദ്യ ഇഷ്ടപ്പെട്ടാല്‍ മുകളില്‍ നിന്നും താഴേയ്ക്കായി ഇല മടക്കുന്നു. ശേഷം നാലും കൂട്ടി മുറുക്കുന്നതാണ് സദ്യയ്ക്കു ശേഷം പരമ്പരാഗതമായ ചടങ്ങ്.

ആള്‍ ഇരുന്ന ശേഷം മാത്രമാണ് ചോറ് വിളമ്പേണ്ടത്. കറികള്‍ ആദ്യം വിളമ്പാം. പായസം ഊണു കഴിയുന്ന മുറയ്ക്കാണ് വിളമ്പേണ്ടത്. ഊണു കഴിച്ചെഴുന്നേറ്റാല്‍ നാലും കൂട്ടിയുള്ള മുറുക്കുന്നതും പലയിടത്തും പ്രധാനമാണ് .